Eurobondi i ri, Agalliu: E paqartë se ku do të shpenzohen. Mund të na çojë në kolaps të financave publike

Rritja e borxhit publik që mund të na çojë në kolaps të financave publike dhe paqartësia se ku do të shpërndahet 200 mln euro, janë problemet që sheh deputeti demokrat, Arbi Agalliu, tek eurobondi i ri. Në studion e "Ditarit" në A2 CNN, ai tha se Partia Demokratike ka kërkuar transparencë se ku do të shpenzohen këto para.

“Marrja e borxhit mund të jetë e nevojshme në këto kushte dhe rekomandohet, por fatkeqësisht borxhi ka ardhur në rritje. Shqetësues është fakti i marrjes së eurobondit duke mos ditur vlerën janë 200 mln euro diferencë dhe nuk ka strategji ku do të shpërndahen këto para. Në relacion flitet për shpenzime të përgjithshme dhe nuk e ka të përcaktuar se ku do të investohet dhe kjo na lë të kuptohet se do të ketë abuzime. E paqartë është dhe mënyra sesi këto para do të shkojë te konsumatori fundor. Nëse ne marrim para për të mbuluar gropat e buxhetit të shtetit për të shlyer borxhe, për paga e pensione kjo do të jetë katastrofë. Para borxh merren për të investuar për rimëkëmbjen e ekonomisë. Ne kemi kërkuar të na bëhet e qartë se ku do të shkojë çdo cent i marrë. Nuk na u tha. Problem është borxhi, nëse do të marrim edhe këtë borxh shkojmë në kolaps të financave publike. Raporti i FMN-së thotë që të bëhen investime vetëm në sektorë strategjikë në këtë situatë pandemie. Shqipëria nuk ka treguar seriozitet mbi investimet publike. Ka abuzueshmëri. Ne nuk kemi nevojë të marrim borxhe, nëse nuk mirëmenaxhojmë financat tona”.

Sipas Agalliut, normat e interesit të vendit tonë janë shumë më të larta se vendet e rajonit.

“Normat e interesit janë më të larta se ato në rajon, p.sh. Maqedonia  e Veriut ka marrë me 1.6 %, kurse ne me 3.5%. Të bëhet transparent të shkohet atje ku duhet dhe mënyra e kthimit mbrapsht”. (A2 Televizion)