Seanca e kësaj të hënë ishte e para e kësaj legjislature ku deputetët duhet të diskutonin për problematika të hasura në terren. Por agjenda politike prevaloi mbi ato qytetare. Kryedemokrati Lulzim Basha shfrytëzoi minutazhin për të prezantuar amendamente kushtetuese, ku më shumë peshë i dha vettingut në politikë duke akuzuar kundërshtarët e saj brenda dhe jashtë parlamentit.
“Ne e kemi hedhur hapin e parë. Kundërshtarët e egër të këtij propozimi janë ata që rrezikojnë qëndrimin në këtë sallë, për shkak të korrupsionit dhe lidhjeve të tyre me krimin”, tha kreu i PD.
Në mungesë të Edi Ramës, përgjigje i ktheu Taulant Balla ku u kujdes t’i kujtonte Bashës se në Kuvend është edhe propozimi i PS-së për vettingun në gjyqësor si një kërkesë e partnerëve.
“Do t’i shqyrtojmë të gjitha në dritën e rekomandimeve të ODIHR kur bëhet fjalë për çështjet e reformës zgjedhore, të opinionit të Venecias kur bëhet fjalë për çështje të tjera. Në fund të fundit kemi edhe ne një propozim që dua ta qartësoj se nuk ka qenë një propozim i yni, por një rekomandim nga partnerët që i janë drejtuar zyrtarisht kryetares së Kuvendit”, tha Taulant Balla.
20 minuta nuk mjaftuan për kryedemokratin, i cili nuk nguroi të replikonte me disa socialistë ku kryefjalë kishte korrupsionin.
“Përgjigjen për gjëmat e regjimit e ke këtu të freskët, Shqipëria e dytë në botë për nivelin e ryshfetit, tre herë më lartë se në vitin 2013. Ky është baba i korrupsionit, nëna e korrupsionit e keq që ka zënë për fyti”, shtoi Basha.
Akuzat e kryedemokratit nuk mbetën sërish pa përgjigje. Ketë herë ishte ministrja Elisa Spiropali e cila ngriti akuza ndaj Bashës se i ka shpëtuar drejtësisë me procedurë.
“Ju e të tjerë i keni shpëtuar kësaj drejtësie me procedurë pa u hetuar asnjëherë për rrugë e ura që flisni këtu. Do të ishte mirë të jepnit një herë llogari pa procedurë e pastaj të vini e të flisni këtu”, akuzoi Spiropali.
Ndonëse me tone jo shumë të larta, seanca vijoi punimet nën akuza nga opozita për nivelin e korrupsionit nga opozita. (A2 Televizion)
A2 CNN Livestream
MUND TE LEXONI GJITHASHTU
