Fjalimi i parë i Begajt: Interesi ynë i përbashkët, konsolidimi i institucioneve

Në ceremoninë zyrtare të marrjes së detyrës, Presidenti i ri Bajram Begaj premtoi se do të jetë “shërbëtor i popullit” dhe “përfaqësues i unitetit tonë kombëtar”.

“Që sot, kam përgjegjësi më të madhe ndaj qytetarëve të kombit tim, ndaj partnerëve të Shqipërisë. Do të jem shërbetor i popullit tim, përfaqësues i unitetit tonë kombëtar. Do të jem mbështetës i palëkundur i rrugëtimit euro-atlantik për të gjithë shqiptarët e Shqipërisë, Kosovës, Maqedonisë së Veriut, Malit të Zi dhe Luginës së Preshevës”, tha Begaj.

Më tej, Presidenti shtoi: “Dialogu, bashkëpunimi dhe debati sjellin mirëqënie, zhvillim e progres për qytetarët dhe vendin. Interesi ynë i përbashkët mbetet konsolidimi i institucioneve. Inkurajoj çdo veprim për marrëdhënie të shëndosha mes institucioneve kushtetuese. Mbajtja e Konferencës së parë Ndërqeveritare me BE është arritje e madhe e Shqipërisë dhe shqiptarëve. Ky është vetëm fillimi i një kapitulli të ri, në të cilin do duhet të jemi të gjithë bashkë, krah për krah”. (A2 Televizion)