ITALI - Juventus fiton titullin kampion, duke hyrë në legjendë. Kampionati i tetë në radhë, diçka që askush nuk e kishte realizuar më parë në Itali. Një dominim që ka nisur prej vitit 2012 dhe ku asnjë rival nuk ka mundur të bëjë asgjë. Titulli i sezonit të kaluar u sigurua pesë javë përpara fundit të Serisë A, duke barazuar rekordin e Interit në vitin 2007. Supremacia erdhi prej investimeve të jashtëzakonshme, me afrimin e emrave si Cristiano Ronaldo apo Cancelo dhe rikthimi i Bonucci-t. Lazio fitoi kupën dhe vetëm pak ditë para mbylljes së vitit triumfoi edhe në finalen e Superkupës në Arabinë Saudite. 
ANGLI – Manchester City triumfoi në Premier League. Skuadra e Pep Guardiola-s u konfirmua në fronin e futbollit anglez, pas një sezoni të luftuar me Liverpool. Manchester City grumbulloi 98 pikë, vetëm një më tepër se Reds. Me 97 pikë në Premier, ekipi i Klop do të ishte shpallur kampion në 25 nga 27 sezonet e fundit në Angli. Të vetmet edicione si vend i dytë janë ato të fituara nga Manchester City me rekord pikësh: 100 dhe 98. Liverpool ka hyrë në vitin e 30 ku titulli mungon, ky duket sezoni i mbarë, me Reds që kryesojnë. Manchester City fitoi edhe Superkupën e Anglisë, FA Cup dhe Kupën e Ligës. 
SPANJË - Barcelona fitoi titullin në La Liga. Suksesi i dytë me radhë në kampionat dhe titulli numër 26 për katalanasit. Diferenca me 9 pikë nga Atletiko e Madriditdhe 19 nga Reali, konfirmoi dominimin e blaugranave. Valencia fitoi në Kupën e Mbretit, duke mposhtur 2-1 Barcelonën. Trofeu i tetë në histori për Los Ches dhe i pari prej vitit 2008. 
GJERMANI – Bayern Munchen fitoi titullin kampion dhe Kupën e Gjermanisë. Ky ishte titulli i shtatë kampion me radhë në Bundesligë dhe triumfi i 29 në histori. Festa ishte përtej çdo imagjinate, mbi të gjitha sepse tifozët në Allianz Arena i dhanë lamtumirën pas 12 sezoneve legjendës Ribery, ndërsa Robben, i mbiquajtur “Mr Wembley”, u largua pas 10 viteve. Në fillim të sezonit, bavarezët kishin humbur Superkupën në finalen me Borussia Dortmund. 
FRANCË – Paris Saint Germain fitoi titullin kampion dhe Superkupën. Parisienët u shpallën kampionë të Francës përherë të tetë në histori, ndërsa ky ishte titulli i gjashtë në 7 vitet e fundit. Suksesi u formalizua pesë javë përpara fundit të sezonit, ndërsa PSG kishte shpërdoruar edhe tre shanse të mëparshme për të mbyllur matematikisht garën. 
KUPAT E EUROPËS – Dominim absolut i skuadrave angleze: për herë të parë në histori, në të dyja finalet e trofeve europianë kishte derbi anglez. Liverpool triumfoi në finalen e Champions, ku fitoi 2-0 në Madrid përballë Tottenham. Chelsea triumfoi në finalen e Europa League pas fitores ndaj Arsenalit në finalen në Baku. Liverpool fitoi edhe Superkupën e Europës në duelin mes fituesve të Champions dhe Europa League, me Chelsea-n që ishte viktima e radhës. Reds triumfuan edhe në Botërorin për Klube. Ekipi i Klopp mposhti në finale Flamengon, fitues të Copa Libertadores. Ndeshja u vendos nga goli në kohën shtesë i Roberto Firminos. 
KUPA E AMERIKËS - Brazili fitoi edicionin e 46 të Kupës së Amerikës: triumfi i nëntë në histori. Seleçao mposhti 3-1 Perunë në finalen e luajtur në stadiumin Maracana, Rio de Janeiro. Kupa e Amerikës u ndikua nga polemikat, me Lionel Messin që akuzoi për korrupsion, duke thënë se i gjithë turneu ishte organizuar për tu fituar nga Brazili. Ylli argjentinas u pezullua për tre muaj. Argjentina humbi 2-0 në gjysmëfinale me Brazilin, pas gabimeve të rënda të arbitrit, ndërsa fitoi 2-1 finalen për vendin e tretë me Kilin. Në atë ndeshje Messi u ndëshkua me karton të kuq. 
KUPA E AFRIKËS – Algjeria u shpall kampione, pas triumfit në Kupën e Afrikës 2019. Një sukses që erdhi pas rezultatit 1-0 në finalen ndaj Senegalit, me golin vendimtar të Bunejah prej sekondave të para të lojës. Algjeria e dominoi lojën në finale, ashtu sikundër tregoi gjatë gjithë turneut se ishte skuadra më e mirë. Të besuarit e trajnerit Jamel Belmadi e mposhtën Senegalin për herë të dytë, pas ndeshjeve në grupe, ndërsa në rrugëtimin e tyre kaluan Guinenë, Bregun e Fildishtë me penallti dhe Nigerinë në gjysmëfinale. Algjeria priti 29 vjet për të festuar. Ky ishte triumfi i dytë në histori për “Dhelprat e Shkretëtirës”, pas atij të vitit1990. 
FORMULA 1 – Lewis Hamilton (Mercedes) mori titullin e gjashtë kampion bote. Britaniku bëhet piloti i dytë më i suksesshëm në histori dhe tani është vetëm një titull larg rekordit të Michael Schumacher. Festa ishte edhe për skuadrën Mercedes, që fitoi titullin për konstruktorë, duke mos e vendosur triumfin asnjëherë në histori. 
MOTO GP – Marc Marquez (Honda) mori titullin e gjashtë kampion në klasin mbretëror të garave me motorë. Spanjolli është edhe njeriu i rekordeve, sepse përveç 6 titujve në shtatë vjet në MotoGP, numëron në total 8 tituj në 10 vjet në të gjitha kategoritë. Marquez është i pari që arrin këto suksese në moshën vetëm 26-vjeçare. 
FORMULA E - Jean-Eric Vergne (DS Techeetah) hyri në histori si i pari që arrin të fitojë dy tituj me radhë në garën e shpejtësisë me makina elektrike. 
TOUR DE FRANCE: Egan Bernal (Ineos) u bë i pari nga Amerika Latine (Kolumbia) që triumfin në garën më prestigjioze çiklistike. 
BOTËRORI I BASKET – Spanja u shpallet kampione e botës për të dytën herë në histori. Në finalen e luajtur në Pekin, iberikët mposhtën Argjentinën, me rezultatin 95-75. Spanjollët e dominuan turneun, duke e fituar titullin me tetë fitore dhe pa asnjë humbje. 
SUPERBOWL NFL – New England fitoi titullin, pasi mposhtën Los Angeles Rams në finale, me rezultatin 13-3. Me këtë triumf, Patriots ngjiten në kuotën e 6 titujve, duke barazuar Pittsburgh Steelers si dy skuadrat më fituese në histori. 
TENIS – Novak Djokovic triumfoi në Australian Open, ku mposhti në finale Rafael Nadal. Suksesi i 15 në turnetë madhorë dhe një rekord, duke fituar titullin e 7 në Melburn. Ai mori edhe titullin në Madrid Open, për herë të tretë në karrierë në kryeqytetin spanjoll, por këtë herë duke mos humbur asnjë set. Serbi triumfoi në Wimbledon, duke regjistruar suksesin e 16 në Grand Slam, pasi mposhti Roger Federer në një finale epike, pas 5 seteve që zgjatën 4 orë e 57 minuta, më e gjata në historinë e Wimbledon. Novak Djokovic fitoi edhe turneun e parë në Japoni, duke e ngritur në 76 numrin e titujve të fituar. Një sukses i rëndësishëm pas dëmtimit në shpatull, që e detyroi të hiqte dore nga mbrojtja e titullit në U.S. Open. Ai e mbylli vitin duke fituar edhe turneun Master të Parisit.
Nga futbolli, te Formula E, protagonistët e vitit që lamë pas. (A2 Televizion)
Galeria fotografike ( )
A2 CNN Livestream
MUND TE LEXONI GJITHASHTU
