Në kushtet kur kemi dy drafte ekzistente, me propozime konkrete, që diferencën në dukje e kanë te listimi numerik ose alfabetik dhe një palë të tretë që shfaq pakënaqësitë dhe ngrin procesin për shkak të elementit të koalicioneve, sipas draftit socialist, ne kërkojmë ndihmën dhe ekspertizën për t’i dekoduar formulat.
Eksperti për sistemet zgjedhore, ish-kreu i Komisionit Qendror të Zgjedhjeve, Kristaq Kume, bëri një koment në A2 të këtyre drafteve.
Drafti i propozuar nga socialistët, çfarë thotë formula?
“PS është dakordësuar që lista e zgjedhësve të hapet 100% në parim. Por për mendimin tim, duke iu referuar mënyrës se si do të veprohet me votat parapëlqyese, realisht lista mbetet ajo që propozohet nga partia. Është shumë e vogël mundësia që të kemi një rirenditje të kandidatëve si rezultat i votës parapëlqyese të zgjedhësve. Nëse do të votohet me këtë mënyrë, në ulëset e Kuvendit të Shqipërisë do të ketë shumë pak deputetë që mund të vijnë prej votës preferenciale. Deputetët do të jenë rezultat i vullnetit të partive politike. Ky mekanizëm e bën të pamundur efektivitetin e votës preferenciale të qytetarëve.
Ndodhemi përpara ndryshimeve kushtetuese, të cilat kërkojnë të votohet në mënyrë preferenciale. Kushtetuta kërkon që 2/3 e votave të kandidatëve të jenë me votë preferenciale. Sipas variantit të propozuar nga PS-ja, do të thotë se kemi një listë të hapur, por nuk kemi rezultat zgjedhor si produkt i listës së hapur, ky është ndryshimi”.
Drafti i propozuar nga Rudina Hajdari
Ndërkohë, propozimi i bërë nga Rudina Hajdari e trajton ndryshe problemin. Ky propozim realizon gjithçka çfarë mund të arrihet me vota preferenciale. Përpara vullnetit të zgjedhësve të shprehur me votën preferenciale të tyre do të ndodhen të gjithë kandidatët e subjektit përkatës dhe rezultati përfundimtar do të jetë efekt i votave që ata do të marrin.
Formula e propozuar për koalicionet
“Ka dy momente që e mbajnë të ndezur këtë diskutim. Momenti i parë ka të bëjë me mënyrën dhe rrugën që u ndoq për të bërë këto ndryshime kushtetuese, të cilat nuk përfshijnë opozitën jashtë parlamentare. E dyta, mënyra se si është zgjidhur problemi i garës në një proces zgjedhor. Opozita jashtë parlamentare, duke iu referuar situatës politike jashtë parlamentare vlerëson se po të garohej me koalicione si ata që është garuar deri më sot, do të ketë më tepër vota se mazhoranca. E gjithë kjo, me ndryshimet e bëra në kushtetutë duhet që të trajtohet, që të zgjidhet. Duhet të bëhen përpjekje, veçanërisht nga opozita jashtë parlamentare për të minimizuar në maksimum efektin jo pozitiv që ka kjo mënyrë e të trajtuarit të problemin e koalicioneve. Kjo është në të drejtën e opozitës t’i drejtohet OSBE/ODIHR”. (A2 Televizion)
A2 CNN Livestream
MUND TE LEXONI GJITHASHTU
