Përmeti: Drafti i PS për reformën zgjedhore, një mashtrim i madh

Për të folur për zhvillimet politike në vend ishte i ftuar në Dita Jonë Andi Përmeti, deputet nga Bindja Demokratike.

Përmeti u shpreh se drafti i PS për reformën zgjedhore është një mashtrim i madh, ndërsa shton se ai tenton të lërë në lojë vetëm 3 palë.

“Ne kemi kërkuar që në fillim një sistem kombëtar me lista të hapura, por kjo nuk u pranua. Sot, drafti që ka ardhur tenton të lërë në lojë vetëm 3 palë. Sigurisht që ne ndaj këtij drafti jo vetëm jemi kundër, por na duket në kufijtë e çmendurisë. Ne do të luftojmë kundër këtij drafti. Ne kemi vetëm dy mundësi. E para, është mundësia publike, për t’i treguar qytetarëve që është një mashtrim i madh, i cili kryesisht po i bëhet nga Edi Rama. Është e habitshme që edhe Partia Demokratike nuk po e lufton fort dhe nuk po mundohet ta rrëzojë fort këtë draft. Ndërsa presidenti Meta e ka rrëzuar këtë draft. Përveç zërit tonë publik, në këtë rast, nuk kemi shumë në dorë për të bërë, por nuk do të dorëzohemi”, u shpreh Përmeti.

Por pse e quan Përmeti një mashtrim draftin e PS? “Kjo parti ka futur atë që ne e quajmë kleçkë elektorale. PS kërkon që vërtetë ajo të bëjë renditjen dhe mandatet të shpërndahen së saj, por në qoftë se një njeri poshtë listës fituese kërkon të hyjë te fituesit duhet të marrë një votë më shumë se mesatarja e votave të asaj partie për ndarjen e mandateve. Një shembull: Qarku i Korçës, nëse PS merr 4 deputetë dhe ka marrë 40 mijë vota, mesatarja i bie 10 mijë vota. I katërti i renditur ka marrë vetëm 7 vota, vetëm familja, hyn përsëri i i katërti, ndërsa i pesti, pavarësisht se ka marrë 9999 sërish nuk hyn. Problemi tjetër, i cili është edhe më i rëndë, që është shkelja e kushtetutës, ka të bëjë me partitë e vogla. Si mund të kalohet herësi i një mandati kur ai pjesëtohet me 1. Kjo do të thotë se atë mandat e merr i pari i listës dhe në këtë aspekt, ky sistem është më i mbyllur se sa i mbylluri”. (A2 Televizion)