Britania e Madhe mbështet marrëveshjen politike të 5 qershorit dhe nëse do të ketë vazhdimësi të reformës, ajo duhet të jetë transparente dhe me konsensus. Kështu u shpreh nga Shkodra, ambasadori Duncan Norman.
“Ne ishim mbështetës të ndryshimeve që u bënë në 5 qershor, një marrëveshje që u dakordësua nga të gjithë dhe mendimi ynë është që ajo nuk duhet të ndryshojë. Nëse do të kishte vazhdimësi të reformës, ajo duhej të bëhej në mënyrë sa më transparente dhe me konsensusin e duhur”, tha ambasadori.
Norman beson se në Shqipëri mund të zhvillohen zgjedhje të lira: “Unë besoj realisht se nëse do të ekzistonte vullneti politik, Shqipëria do të mund të ketë zgjidhje të lira dhe të ndershme. Kjo është diçka që mund të arrihet”.
Ambasadori nuk pranoi të komentonte qëndrimet e Presidentit Ilir Meta në lidhje me zhvillimet politike në vend: “Presidenti ka një rol të qartë kushtetues dhe ai vepron mbi atë që mendon se është më e drejtë për Kushtetutën. Nuk mendoj se do të ishte vendi i duhur që të komentoj rolin e Presidentit”.
Duncan Norman ka qenë një prej ambasadorëve që ka mbështetur zhvillimet e Këshillit Politik, duke inkurajuar dialog mes palëve për të gjetur konsensusin e duhur. Bashkë me amerikanët, ai ka qenë një prej zërave më të fuqishëm të politikës së jashtme në Tiranë. (A2 Televizion)
A2 CNN Livestream
MUND TE LEXONI GJITHASHTU
