Prej disa javësh, qeveria e ka deklaruar vendin në krizë energjitike. Simbolika ishte e dukshme edhe në punimet e komisioneve parlamentare, të cilat mbetën disa minuta pa drita. Si për ironi të fatit, edhe kredia prej 70 milionë eurosh për Operatorin e Shpërndarjes së Energjisë Elektrike (OSHEE), u miratua në errësirë.
Një situatë paradoksale, u krijua në komisionet parlamentare, këtë të martë. Gjatë shqyrtimit të projektligjit për huanë 70 milionë euroshe, me qëllim mbështetjen financiare të OSHEE, kreut të këtij dikasteri iu ndërpre fjala në mes. Shkak ishin dritat.
Për disa çaste, punimet vijuan pa energji elektrike dhe mbledhja iu rikthye normalitetit. Ministrja Belinda Balluku nënvizoi se pavarësisht krizës, çmimet për konsumatorët nuk do të rriten: “Nuk parashikojmë që të kemi rritje të çmimeve dhe nuk është synimi ynë që të balancojmë çmimin e ulët me të cilin ia japim konsumatorit me çmimin e lartë me të cilin blihet”.
E njëjta nismë, u shqyrtua edhe në Komisionin e Ligjeve, ku mbledhja nuk kaloi aq qetë. Shkak i zërave të ngritur ishte qëndrimi i zëvendësministrit të Energjitikës, Ilir Bejtja, për sa i përket aksionit kundër debitorëve të energjisë, ku në mesin e të ndaluarve pati edhe humbje jete: “Ka pasur depresion se ai e ka pasur debinë 35 mijë lekë të vjetra, ia solli mendja e vet se për 35 mijë lekë të vjetra nuk varet njeri”.
Qëndrimet e zëvendësministrit u kundërshtuan jo vetëm nga opozita, por edhe nga kolegët socialistë.
Përplasja me opozitën kaloi më pas në rrafshin personal. Ilir Bejtja iu drejtua me këto fjalë Gazment Bardhit: “Ti ke vrarë një njeri në Elbasan, mër. Ke vrarë”.
“Ti je hajdut”, ia ktheu Bardhi.
“Me kë flet ti? Ti je hajdut se më ke vjedhur mua një shok”, u kundërpërgjigj Bejtja.
Minutat që kaluan ndihmuan në qetësimin e situatës, por nuk mjaftuan për të zgjidhur problemin e furnizimit me energji të Kryesisë së Kuvendit, ku ndërprerja e rrymës vijoi të përsëritej.
(A2 Televizion)
A2 CNN Livestream
MUND TE LEXONI GJITHASHTU
