​“Lufta” me Wagner, Rusia rrit masat e sigurisë në autostradën në hyrje të Moskës

Disa pamje të publikuara në mediat ruse tregojnë se sot janë shtuar masat e sigurisë në autostradën drejt kryeqytetit rus, Moskë pas përleshjeve të fundit midis Rusisë dhe grupit paraushtarak Wagner. Numri i autokolonave të automjeteve ushtarake dhe kamionëve, është rritur në hyrje të Moskës nga autostrada federale M4, e cila lidh Rostov-on-Don dhe kryeqytetin.

Për shkak të masave të shtuara të sigurisë në rajon, ka pasur bllokim trafiku në disa pjesë të autostradës. Të shtunën, presidenti rus Vladimir Putin akuzoi shefin e Wagner, Yevgeny Prigozhin për tradhti, pasi luftëtarët e tij paraushtarakë kaluan kufirin nga Ukraina në Rusi, duke hyrë në qytetin e Rostov-on-Don.

Prigozhin akuzoi forcat ruse për sulmimin e luftëtarëve të tij, një pretendim që Moska e mohon. Shefi i Wagner në muajt e fundit ka akuzuar në mënyrë të përsëritur Ministrinë ruse të Mbrojtjes dhe ministrin e Mbrojtjes, Sergej Shoygu se nuk i kanë furnizuar me armë të mjaftueshme grupit të tij paraushtarak. (A2 Televizion)