Leo Messi, nga sot lojtar i lirë. 
Gianluigi Donnarumma: Ndoshta për pak orë ai do të firmosë me Paris SG, por zyrtarisht është lojtar i lirë pas përfundimit të kontratës me Milanin. 22-vjeçari është momentalisht i grumbulluar me Italinë në Europian dhe nuk ka firmosur ende me PSG. 
Elseid Hysaj: Mundësitë e rinovimit me Napolin janë thuajse zero. Lazio duket se do të jetë skuadra e re, ku përveç Igli Tares, do të gjejë edhe trajnerin e ri të klubit roman, Maurizio Sarri, me të cilin ka punuar më parë te Napoli. 
Sergio Ramos: Një tjetër lojtar që duket se do të përfundojë në Paris. Veterani i mbrojtjes është zyrtarisht lojtar i lirë dhe përveç PSG, Manchester City dhe Bayern Munchen janë përmendur si skuadra që e kanë menduar për prapavijën e tyre. 
Jerome Boateng: Ndryshe nga David Alaba, i cili nënshkroi me Real Madrid, Boateng mbylli aventurën e tij 10-vjeçare me Bayern. Tottenham, Monaco dhe Roma janë skuadrat që flitet se kanë shfaqur interes, por asgjë nuk është zyrtarizuar. 
Jack Wilshere: Në një “univers paralel” mesfushori që dikur konsiderohej si talenti më i madh i Anglisë, do të duhet të ishte në Europian duke luftuar për trofeun. Por këtë verë 29-vjeçari është në kërkim të një skuadre të re, pasi Bournemouth nuk i rinovoi kontratën. 
Juan Mata: Spanjolli dëshiron të qëndrojë te Manchester United edhe pse kontrata ka përfunduar, por me vetëm 18 ndeshje të luajtura sezonin e kaluar e ardhmja mbetet ende e paqartë. 
Franck Ribery: Pas dy sezonesh dhe vetëm 5 golash, francezi mbylli aventurën e tij te Fiorentina. 38-vjeçari do të kishte dashur të qëndronte në Firence, por klubi vendosi të mos rinovojë. Do të jetë e vështirë të qëndrojë në nivelet e larta të futbollit europian, por dëshira dhe vullneti nuk i mungojnë, pavarësisht mundësive fizike.
Përfundimi i kontratës së Lionel Messi-t me Barcelonën sigurisht që është lajmi i parë në botën e sportit për sot. Argjentinasi me shumë mundësi do të rinovojë me klubin katalanas, por derisa të hidhet firma, ai mbetet lojtar i lirë dhe mund të negociojë me këdo.
Por nga sot, përveç tij, janë edhe disa lojtarë të tjerë që kanë mbyllur kontratat me klubet respektive dhe janë në kërkim të një skuadre të re. Mes tyre edhe një lojtar i rëndësishëm i kombëtares shqiptare. (A2 Televizion)
Galeria fotografike ( )
