Për Presidentin Ilir Meta, mendimi i mazhorancës është më i rëndësishmi për caktimin e një date zgjedhjesh. Në zyrën e tij, Ilir Meta ftoi vetëm Taulant Ballën për konsultime, që i quajti informale, duke ngritur dyshime për një kthim me 180 gradë të kursit politik në raport me shumicën.
Surprizën e datës së zgjedhjeve, Ilir Metës ia prishi Taulant Balla, i vetmi i ftuar në Presidencë për konsultim nga Kreu i Shtetit.
“Për ne nuk ka asnjë datë. Presidenti mendon që zgjedhjet e pjesshme të zhvillohen në 6 mars”, tha Balla.
Një ftesë të tillë, Ilir Meta nuk ia kishte dërguar opozitarëve, madje as gruas së tij, duke nxitur hamendësime nëse peshorja presidenciale ka nisur të anojë në kampin e mazhorancës.
Arsyet se përse kishte vendosur t’i bënte dalje opozitës, Kreu i Shtetit doli t’i shpjegonte publikisht jashtë zyrës së tij: “Nuk ishte ndonjë gjë e rëndësishme për të pasur në takim. Kisha dyshime mos bojkotonte shumica. Zoti Taulant është i madhërishëm, është përfaqësues i shumicës, i cakton vendin edhe pakicës”.
Përllogaritja e afateve e mundoi Presidentin me shkresa zyrtare derisa mori konfirmimin me shkrim se sa bashki janë pa kryetar: “1, 2, 3, 4, 5, 6 bashki janë. Nëse del ndonjë tjetër, do e dekretojmë”.
Dashamirësia publike ndërmjet Metës dhe Ballës nuk u prit mirë nga Partia Demokratike. Sekretari i Përgjitshëm, Gazment Bardhi, e cilësoi si një teatër publik i brinjëve të Trekëndëshit të Bermudës. Ndërsa zëdhënësi i Presidentit replikoi duke nënvizuar se Meta takohet me Ballën në publik dhe ditën për diell, ndërsa aludoi se demokratët takohen fshehurazi dhe natën me kryetarin e shumicës në Kuvend. (A2 Televizion)
A2 CNN Livestream
MUND TE LEXONI GJITHASHTU
