Ilir Meta zgjodhi Kosovën në vizitën e tij të fundit zyrtare si President. Kreu i Shtetit premtoi se sapo të lërë detyrën, do të bëjë më shumë për Kosovën.
“E vetmja keqardhje që kam është që mund të kisha bërë edhe më shumë në përkrahjen e Kosovës nëse do të kisha më pak probleme të brendshme në vendin tim gjatë këtyre 5 viteve. Por, ju jap fjalën se nga 25 korriku në mëngjes, do të bëj shumë herë më tepër. Kemi pasur marrëdhënie të shkëlqyer me ju dhe të gjithë institucionet e Kosovës dhe do të vijojmë në të ardhmen. Jam i bindur se Presidenti i zgjedhur i Shqipërisë do të vijojë këtë traditë shumë pozitive”, tha Meta në konferencën e përbashkët për shtyp me homologen e tij, Vjosa Osmani.
Presidenti nuk la pa përmendur edhe luftën në Kosovë: “Duke ardhur dje për në Prishtinë, po mendoja ato 4 javët e para të situatës në Kukës, pas fillimit të ndërhyrjes së NATO-s më 24 mars, ditën kur bëja 30 vjeç dhe pata fatin të mos e festoja ku kisha planifikuar. Buxheti i Shqipërisë ishte katastrofik dhe në momentet më të vështira dhe që dukeshin si më të pashpresa, shkëlqeu fisnikëria e kuksianëve në mënyrë të veçantë, edhe ata të pambështetur nga shteti. Kanë qenë javë të paharruara. Nuk ka asnjë vështirësi që nuk tejkalohet”. (A2 Televizion)
A2 CNN Livestream
MUND TE LEXONI GJITHASHTU
