Moti i keq me reshje shiu dhe dëbore ka shkaktuar probleme në Juglindje të vendit. Përveç vështirësive në qarkullim të shkaktuar nga dëbora, fshatra të tërë vuajnë prej 48 orësh mungesën e energjisë elektrike. Probleme me energjinë elektrike vijon të ketë në territorin e Bashkisë Maliq, pasi reshjet janë shoqëruar edhe me erë të fortë.
Mungesë të energjisë ka në Gorë, Moglicë, Kolanec, Zboqëri ndërsa mësohet se grupet e punës ndodhen në terren për të rikthyer energjinë.
Ndërkohë në Pogradec prej 48 orësh pa energji janë dy njësi administrative Dardhas dhe Trebinjë dhe 6 fshatra në njësinë Proptisht. Oshee thotë se është duke punuar por në asnjë nga tre njësitë energjia nuk është kthyer deri më tani.
Si pasojë e reshjeve të shumta në segmentin e Dardhës trashësia e dëborës ka shkuar deri në 70 cm, ku pavarësisht punës dhe mirëmbajtjes së rrugës mjetet e vogla gjatë paradites duhet të jenë të pajisura me zinxhirë, ndërsa Voskopoja dhe Qafa e Qarrit nuk kane probleme me kalueshmërinë e mjeteve pasi dëbora varion nga 5 deri ne 15 cm.
Ka pasur edhe rrëshqitje dherash në fshatin Zall Torrë dhe po merren masa për hapjen e rrugës.
Akset nacionale aktualisht janë të hapura dhe nuk paraqiten probleme me përjashtim të disa rrugëve dytësore rurale në të cilat mund të qarkullohet vetëm me zinxhirë.
Këshillohet për të gjithë drejtuesit e mjeteve të tregojnë kujdes dhe të respektojnë rregullat e qarkullimit rrugor. (A2 Televizion)
A2 CNN Livestream
MUND TE LEXONI GJITHASHTU
