Pamundësia financiare për të paguar 28 kilometra transport ka bërë që një grup pacientësh nga fshati Mollas i Bashkisë së Cërrikut të rrezikojnë jetën, pasi janë në pamundësi për të shkuar në spitalin e Elbasanit për të bërë dializën.
Mjeti që i ofronte këtë shërbim dhe që ishte vendosur nga një shoqatë bamirëse tashmë i ka lënë, ashtu sikurse i ka lënë edhe bashkia e Cërrikut, e cila nuk i ka ofruar asnjë ndihmë apo alternativë për të marrë mjekimin e domosdoshëm.
“Kam 3 vjet që jam me dializë, marr 4 autobusë dhe nga mëngjesi kthehem në shtëpi në orën tre, llogariteni vetë”, thotë një nga personat që proteston.
“Çohem në orën 4.30, vjen një furgon nga Belshi që ndalon në Elbasan, më duhet një orë në këmbë të shkoj në spital, kur arrij aty jam komplet pa forca”, thotë një tjetër i moshuar.
Oraret e autobusëve të linjës nuk korrespondojnë me oraret e dializës, dhe për këtë arsye, këta pacientë tejkalojnë disa herë radhën e dializës duke rrezikuar në këtë mënyrë jetën e tyre.
A2 kontaktoi me bashkinë e Cërrikut për këtë problem dhe përgjigja ishte që nuk është kompetencë e kësaj bashkie por e Drejtorisë së Kujdesit Shëndetësore Parësor në Elbasan.
Nga ana tjetër Drejtoria e Kujdesit Shëndetësor shprehet se është kompetencë e bashkisë të licencojë një mjet për këta pacientë. E derisa institucionet të përcaktojnë përgjegjësitë, këta njerëz do të vazhdojnë të enden rrugëve për të marrë shërbimin që u garanton jetën. (A2 Televizion)
A2 CNN Livestream
MUND TE LEXONI GJITHASHTU
