Një pjesë e konsiderueshme e rrugëve në qarkun e Elbasanit janë në gjendje të rënduar në segmente të caktuara. Mungesa e fondeve për mirëmbajtje është një nga shkaqet që e kanë çuar infrastrukturën rrugore në këtë gjendje.
“Pika më e keqe është ajo në bashkinë e Peqinit. Edhe pse është shembur tre çereku i rrugës, nuk është marrë asnjë masë dhe nuk na është kthyer asnjë përgjigje. Problem kudo janë investimet, por bashkia mund t’i gjejë 5 trafikndarës për të kursyer jetë njerëzish”, shprehet Kreshnik Skëndo, shefi i qarkullimit rrugor, qarku Elbasan.
Rruga që lidh Bashkinë e Peqinit me atë të Belshit dhe disa fshatra të tjerë ka pësuar shembje. “Kjo nuk është rrugë. Janë tallur me këtë. Është shumë e rrezikshme”, shprehen banorët.
Edhe aksi Peqin-Elbasan ka mjaft pika të rrezikshme, ku veçohet ajo në afërsi të Paprit, ku kanë ndodhur më shumë aksidente me pasoja fatale.
“Kanë ndodhur 3 aksidente me 6 viktima. Ajo do patjetër një riveshje të asfaltit dhe sinjalistikë”, thotë shefi i qarkullimit rrugor.
Shefi i qarkullimit rrugor për Elbasanin ka kërkuar më shumë bashkëpunim me drejtuesit e pushtetit lokal dhe firmat që kanë fituar të drejtën për të mirëmbajtur akset rrugore dhe mos të mbeten peng i shkresave burokratike. “Duhet të kemi kontakt patjetër. Në rast emergjencash nuk pret koha për shkresa zyrtare”, theksoi Skëndo. (A2 Televizion)
A2 CNN Livestream
MUND TE LEXONI GJITHASHTU
