Ministria e Brendshme në Britaninë e Madhe ka bërë të ditur se 11 shqiptarë janë kthyer me një avion çarter vetëm pak pasi kishin kaluar me gomone Kanalin e La Manshit nga Franca në Angli.
Sipas Daily Mail, 11 emigrantët shqiptarë janë kthyer në Tiranë gjatë javës së kaluar. Kur ata arritën nga Franca në Angli, u vendosën fillimisht në një ish-bazë ajrore në Manston, Kent, e cila është duke u përdorur për vendosjen e emigrantëve. Ata u dërguan me pas në aeroportin Stansted dhe me një avion çarter u kthyen në Tiranë.
Sipas Daily Mail, ky mund të jetë një moment i rëndësishëm drejt zgjidhjes së krizës së emigrantëve që kalojnë Kanalin e La Manshit, ndërsa vjen 7 javë pasi ish-sekretarja e Brendshme, Priti Patel, nënshkroi një marrëveshje historike me ministrin e Brendshëm Shqiptar, Bledi Çuçi, për riatdhesimin e emigrantëve.
Edhe pse ky projekt nuk është ratifikuar përfundimisht, sipas Daily Mail, marrëveshja me palën shqiptare është zbatuar në rastin e 11 emigrantëve të kthyer në Tiranë.
Daily Mail shkruan më tej se numri i emigrantëve shqiptarë që kalojnë Kanalin e La Manshit u rrit në fillim të verës dhe tani ata përbëjnë 60% të të gjithë emigrantëve që kalojnë në Angli nga veriu i Francës. Që prej fillimit të vitit, rreth 37 mijë emigrantë kanë kaluar në Britani me gomone, nga të cilët, sipas Daily Mail, 10 mijë janë shqiptarë. (A2 Televizion)
A2 CNN Livestream
MUND TE LEXONI GJITHASHTU
