Shtatëmbëdhjetë ligjvënës amerikanë, duke përfshirë demokraten Alexandria Ocasio-Cortez, u arrestuan dhe më pas u liruan në një demonstratë pro abortit, të organizuar në Uashington pranë Kapitolit dhe Gjykatës së Lartë të SHBA-së.
Politikanët u mblodhën përpara Kapitolit të SHBA-së përpara se të marshonin drejt ndërtesës së gjykatës, duke brohoritur "trupat tanë, zgjedhja jonë" dhe "ne nuk do të kthehemi më".
Grupi, i cili përfshinte edhe Ilhan Omar, Rashida Tlaib dhe Cori Bush, vazhdoi të qëndronte përgjatë një vendkalimi për këmbësorët, përpara gjykatës, e cila është e rrethuar nga një gardh i madh i zi që pretendohet të jetë i pakalueshëm dhe i ngritur për të mbajtur larg protestuesit.
Ata u ulën në mes të rrugës si një akt mosbindjeje civile paqësore, teksa rreth tyre u mblodh një grup policësh, duke transmetuar një mesazh të regjistruar paraprakisht, ku lajmërohej arrestimi i afërt për bllokimin e rrugës.
“Protestuesit nuk liruan rrugën pas tre paralajmërimeve të zakonshme të bëra nga policia, duke vazhduar bllokimin e trafikut”, sqaron policia në Twitter.
Më pas, oficerët filluan të arrestonin ligjvënësit, duke i lidhur me pranga dhe duke i çuar në një zonë të bllokuar nga rruga.
Në total u arrestuan 35 persona, të cilët më pas u liruan dhe do të duhet të paguajnë gjobë.
Vendimi historik i Gjykatës së Lartë për të drejtën e abortit ka shkaktuar reagime të forta dhe mjaft emocionale në SHBA. (A2 Televizion)
A2 CNN Livestream
MUND TE LEXONI GJITHASHTU
