Provimi i biologjisë, pedagogu gjen gabimin

Bindja e ministres së Arsimit se teza e provimit të biologjisë nuk kishte asnjë gabim shkencor, sipas pedagogut Gentjan Hyka, nuk qëndron.

Për shembull, në pyetjen 33a të provimit, i cili qarkulloi me shpejtësi në rrjetet sociale sapo gjimnazistët hynë brenda në klasa, pedagogu i biologjisë thotë se ka një hartim të gabuar të pyetjes. 

“Provimi ishte i hartuar me pyetje jokorrekte, për shembull, u kërkohej maturantëve të shpjegonin dy fazat e ciklit kardiak të zemrës. Në fakt, cikli kardiak ka tri faza, 2 sistola dhe një diastole”, thekson pedagogu. 

Dega e biologjisë u shërben në provimet me zgjedhje më së shumti maturantëve që do të ndjekin degët e mjekësisë. Sipas pedagogut Hyka, sistemi i rekrutimit të studentëve ende nuk ka një formulë të saktë: “Kur bien notat në provime, bie dhe steka e universiteteve, se ka universitete që kërkojnë kufij note, ka që nuk e kërkojnë. Ka disa shkaqe që sistemi i rekrutimit dështon”. 

Degën e biologjisë e zgjodhën 5 975 maturantë, nga të cilët 59 morën notën maksimale 10, ndërsa 125 prej tyre mbetën. Në rang kombëtar, nota mesatare në këtë lëndë ishte 7,7. (A2 Televizion)