Provokon Rusia, nxjerr luftanijen e re në Detin e Norvegjisë

Nga A2 CNN
10 Janar 2023, 10:03 | Bota

Ushtria ruse vijon me provokimet e saj në këto kohë të tensionuara për shkak të luftës në Ukrainë, duke nxjerrë në një stërvitje ushtarake luftanijen e saj të re të pajisur me armë hipersonike.

Ekuipazhi i anijes kryesore të flotës ruse “Gorshkov” kreu disa manovra të mbrojtjes ajrore në Detin e Norvegjisë, duke vënë në këtë mënyrë dhe autoritetet e këtij vendit në gatishmëri.

Javën e kaluar, presidenti Putin e dërgoi fregatën e re në Oqeanin Atlantik, për t’i dhënë një sinjal Perëndimit se Rusia nuk ka ndërmend të heqë dorë nga i ashtuquajturi “operacion special” në Ukrainë.

Gjatë një konference me ministrin e Mbrojtjes dhe komandantin e luftanijes, Putin deklaroi se është i sigurt se raketat hipersonike Zircon do ta mbrojnë Rusinë nga kërcënimet e jashtme.

Shënjestrimi i një arme hipersonike është shumë i vështirë, pasi këto lloj raketash interkontinentale janë të manovrueshme.

Aktualisht, përveç Rusisë, Kinës dhe SHBA, vendet e tjera që po zhvillojnë armë hipersonike janë Australia, Franca, Gjermania, Koreja e Jugut dhe Japonia. (A2 Televizion)

A2 CNN Livestream

Latest Videos