Sekretari i Përgjithshëm i NATO-s, Mark Rutte, ka folur me një gjuhë të ashpër përballë presidencës së Bosnjes-Hercegovinës. Duke marrë shkas nga dënimi i liderit të Republikës Srpska, Millorad Dodik dhe protestave që e shoqëruan atë vendim, Rutte tha qartë se, tashmë nuk jemi në vitin 1992 dhe se sovraniteti i Bosnjës është një dhe i pandashëm.
“NATO mbështet plotësisht integritetin territorial të Bosnjës dhe udhëheqësit politikë duhet të zgjidhin tensionet që janë nxitur nga një dënim me burg i vendosur ndaj presidentit të rajonit serb të Bosnjës”, tha të hënën Sekretari i Përgjithshëm i aleancës Mark Rutte.
"Ne nuk do të lejojmë që paqja e fituar me vështirësi të rrezikohet. Ju si aleancë trepalëshe duhet të merrni përgjegjësi. Ky vend po shikon nga ju të tre. Bëjeni këtë vend krenar me këtë presidencë dhe zgjidheni këtë problem", shtoi Ai.
Tensionet janë rritur në Bosnje që kur një gjykatë muajin e kaluar dënoi presidentin pro-rus të rajonit serb, Milorad Dodik, me një vit burg dhe e ndaloi atë nga politika për gjashtë vjet. Ai e hodhi poshtë vendimin dhe parlamenti rajonal serb ndaloi policinë kombëtare dhe gjyqësorin nga territori i tij. Vendimi bëri që misioni paqeruajtës i Bashkimit Evropian, EUFOR, të njoftonte një rritje të përkohshme të madhësisë së forcës së saj prej 1100 trupash në vend.
Rutte tha se NATO nuk do të lejonte të krijohej një vakum sigurie dhe se mosrespektimi për marrëveshjen e paqes dhe kushtetutën e Bosnjës ishte "i papranueshëm".
Ai i referohej Marrëveshjes së Paqes të Dejtonit, e cila i dha fund luftës së viteve 1992-95, në të cilën u vranë 100,000 njerëz. Ajo e la Bosnjën të ndarë në dy rajone - Federatën Boshnjako-Kroate dhe republikën Serbe, ose Republika Srpska, me institucione të dobëta qendrore.
Kritikët thonë se Dodik, i cili prej kohësh bën thirrje që Republika Serbe të shkëputet dhe të krijojë një bashkim me Serbinë fqinje, ka qenë një forcë destabilizuese që ka nxitur llojin e tensioneve etnike dhe politike që copëtoi Jugosllavinë në vitet 1990. (A2 Televizion)
A2 CNN Livestream
MUND TE LEXONI GJITHASHTU
