Në mbarë botën, 417 milionë fëmijë, më shumë se një në pesë në vendet me të ardhura të ulëta dhe të mesme, jetojnë në varfëri, të privuar nga të paktën dy nevoja themelore, siç janë ushqyerja dhe higjiena.
Këto statistika janë publikuar në raportin e UNICEF-it "Gjendja e Fëmijëve në Botë 2025: Fundi i Varfërisë së Fëmijëve - Imperativi ynë i Përbashkët", i publikuar sot me rastin e Ditës Botërore të Fëmijëve.
Hulumtimi mbështetet në të dhëna nga mbi 130 vende me të ardhura të ulëta dhe të mesme për të vlerësuar shkallën e varfërisë shumëdimensionale duke matur privimin në gjashtë kategori: arsim, shëndetësi, strehim, ushqyerje, kanalizime dhe ujë, përcjell A2 CNN.
Studimi tregon se 118 milionë fëmijë përjetojnë tre ose më shumë privime, dhe 17 milionë përjetojnë katër ose më shumë.
Shkallët më të larta të varfërisë shumëdimensionale tek fëmijët janë të përqendruara në Afrikën Sub-Sahariane dhe Azinë Jugore. Përqindja e fëmijëve që përjetojnë një ose më shumë privime të rënda në vendet me të ardhura të ulëta dhe të mesme ka rënë nga 51% në vitin 2013 në 41% në vitin 2023, kryesisht falë prioritizimit të të drejtave të fëmijëve në politikat kombëtare dhe planifikimin ekonomik. Megjithatë, progresi po ngadalësohet. Konflikti, krizat klimatike dhe mjedisore, ndryshimet demografike, rritja e borxhit publik dhe zgjerimi i hendekut teknologjik po e përkeqësojnë varfërinë. Në të njëjtën kohë, shkurtimet e paprecedenta në Ndihmën Zyrtare për Zhvillim rrezikojnë të përkeqësojnë privimin e fëmijëve në vendet me të ardhura të ulëta dhe të mesme.
Raporti gjithashtu shqyrton varfërinë monetare, e cila kufizon më tej aksesin e fëmijëve në ushqim, arsim dhe shërbime shëndetësore. Sipas të dhënave më të fundit në dispozicion, mbi 19% e fëmijëve në të gjithë botën jetojnë në varfëri ekstreme monetare, duke mbijetuar me më pak se 3 dollarë në ditë, shkruan A2 CNN. Pothuajse 90% e këtyre fëmijëve janë në Afrikën Sub-Sahariane dhe Azinë Jugore.
Raporti përfshin një analizë të 37 vendeve me të ardhura të larta, afërsisht 50 milionë fëmijë, ku 23% e popullsisë së fëmijëve në këto vende, jetojnë në varfëri relative monetare, duke kufizuar aftësinë e tyre për të marrë pjesë plotësisht në jetën e përditshme.
Edhe pse varfëria u ul me një mesatare prej 2.5% në të 37 vendet midis viteve 2013 dhe 2023, në shumë raste progresi është ngadalësuar ose ka ndryshuar.
Në Francë, Zvicër dhe Mbretërinë e Bashkuar, për shembull, varfëria e fëmijëve është rritur me më shumë se 20%. Gjatë së njëjtës periudhë, Sllovenia e uli shkallën e varfërisë me më shumë se një të katërtën, kryesisht falë një sistemi të fuqishëm të përfitimeve familjare dhe legjislacionit për pagën minimale.
Në Itali, shkalla e varfërisë relative monetare midis fëmijëve ishte rreth 25% midis viteve 2013 dhe 2018, duke rënë në 23.2% në vitin 2023.
(A2 Televizion)
A2 CNN Livestream
MUND TE LEXONI GJITHASHTU
