Bllokohen sistemet bankare në SHBA, mijëra përdorues s'kanë mundësi të hyjnë në llogaritë e tyre

Nga A2 CNN
16 Nëntor 2026, 22:33 | Bota

Problemet teknike kane prekur disa prej bankave më të mëdha në Shtetet e Bashkuara të Amerikës, duke shkaktuar vështirësi për mijëra klientë në përdorimin e shërbimeve bankare online.

Sipas raportimeve të mediave amerikane, përdoruesit kanë denoncuar probleme të shumta përmes platformës Downdetector, kryesisht me hyrjen në llogaritë e tyre bankare përmes faqeve zyrtare dhe aplikacioneve në telefon. Vështirësi janë raportuar gjithashtu në kryerjen e transfertave dhe operacioneve të tjera financiare.

Ndërkohë, shërbimi i asistencës së Chase ka konfirmuar problematikën, duke bërë të ditur se ekipi teknik po punon për të identifikuar dhe zgjidhur defektin që ka prekur platformat e bankingut online.

Deri më tani, shkaku i saktë i ndërprerjeve nuk është bërë i ditur. Episodi vjen pas një sërë problemesh të rënda teknologjike që kanë prekur Shtetet e Bashkuara ditët e fundit. (A2 Televizion)

A2 CNN Livestream

Latest Videos