Britania dhe Kina synojnë të ringjallin të ashtuquajturin dialog të “epokës së artë” në fushën e biznesit, kur kryeministri Keir Starmer të zhvillojë një vizitë të planifikuar në Pekin javën e ardhshme. Këtë e thanë tre burime me njohuri mbi nismën, ndërsa pritet pjesëmarrja e drejtuesve të lartë nga të dyja palët.
AstraZeneca, BP, InterContinental Hotels Group, Jaguar Land Rover, Rolls-Royce, Schroders dhe Standard Chartered janë ndër kompanitë britanike që pritet t’i bashkohen një “Këshilli të rinovuar të CEO-ve Mbretëria e Bashkuar–Kinë”.
Ky këshill u konceptua fillimisht në vitin 2018 nga kryeministrja e atëhershme Theresa May dhe kryeministri kinez i kohës, Li Keqiang, gjatë një periudhe marrëdhëniesh që të dyja palët e quanin “epoka e artë”, shkruan A2.
Pala kineze pritet të përfaqësohet, ndër të tjera, nga Banka e Kinës, Banka Komerciale dhe Industriale e Kinës dhe Grupi Farmaceutik Kombëtar. Negociatat kanë qenë në zhvillim prej disa kohësh, por meqenëse vizita e Starmerit varej kryesisht nga dhënia e lejes nga Londra për ndërtimin e ambasadës më të madhe kineze në Evropë, bisedimet vetëm së fundmi kanë nisur seriozisht.
Starmer pritet të zhvillojë vizitën e parë të një lideri britanik në Kinë që prej vitit 2018, me synimin për të rigjallëruar lidhjet me ekonominë e dytë më të madhe në botë, pasi qeveria paraardhëse konservatore e ktheu Britaninë në një prej kritikëve më të ashpër të Pekinit.
Përpjekjet për t’u afruar me Kinën vijnë teksa Perëndimi është më i përçarë se kurrë në dekadat e fundit. Në prag të vizitës në Pekin, qeveria e Starmerit mori vendimin e guximshëm t’i japë dritën jeshile projektit kinez për ambasadën më të madhe në Evropë, pavarësisht paralajmërimeve nga SHBA se ajo mund të shërbejë si bazë spiunazhi. (A2 Televizion)
A2 CNN Livestream
MUND TE LEXONI GJITHASHTU
