Presidenti i SHBA-së, Donald Trump, përsëriti të dielën se ekziston "një mundësi reale për diçka të madhe në Lindjen e Mesme", pa dhënë detaje të mëtejshme.
"Kemi një mundësi reale për diçka të madhe në Lindjen e Mesme. Të gjithë janë gati për diçka të veçantë, për herë të parë. Do ta bëjmë", shkroi ai në Truth Social.
Siç dihet, të premten presidenti i SHBA-së tha se ishte afër një marrëveshjeje për t'i dhënë fund luftës në Rripin e Gazës dhe për të kthyer pengjet, por ende nuk dihet nëse postimi i sotëm i referohet kësaj gjëje.
Siç vëren Axios, është duke u zhvilluar përpjekja më e rëndësishme deri më sot për t'i dhënë fund luftës, e cila ka vrarë më shumë se 66,000 palestinezë që nga 7 tetori 2023, sipas Ministrisë së Shëndetësisë së Gazës.
"Të gjithë janë bashkuar për të bërë një marrëveshje, por ne ende duhet ta realizojmë atë", i tha Trump, Barak Ravid të Axios në një intervistë telefonike.
Më tej ai shtoi: "Vendet arabe kanë qenë të shkëlqyera në bashkëpunimin për këtë, dhe Hamasi po vjen me ta. Hamasi ka respekt të madh për botën arabe."
"Bota arabe dëshiron paqe, Izraeli dëshiron paqe dhe Bibi dëshiron paqe", theksoi presidenti amerikan, duke përdorur nofkën e Netanyahut.
Trump shtoi se plani synon jo vetëm t'i japë fund luftës në Gaza, por edhe të hapë rrugën për një paqe më të gjerë rajonale.
"Nëse e arrijmë, do të jetë një ditë e shkëlqyer për Izraelin dhe për Lindjen e Mesme. Do të jetë shansi i parë i vërtetë për paqe në Lindjen e Mesme. Por së pari duhet ta kryejmë”, theksoi ai.
Sipas Ravid në Channel 12, Trump ishte plot shpresë se marrëveshja mund të finalizohet në takimin e së hënës dhe të shpallet po atë ditë ose ditën tjetër. (A2 Televizion)
A2 CNN Livestream
MUND TE LEXONI GJITHASHTU
