Gjykata e Lartë e Sllovakisë ka lënë në fuqi të mërkurën një dënim me 21 vite burg për një burrë që qëlloi ndaj kryeministrit Robert Fico dy vite më parë, duke hedhur poshtë apelimin e tij kundër akuzave për terrorizëm, raportuan mediat sllovake.
Një gjykatë sllovake në tetor të vitit të kaluar vendosi se Juraj Cintula, tashmë 73 vjeç, ishte fajtor për akuza terrorizmi pasi qëlloi pesë herë ndaj Ficos nga një distancë e afërt, ndërsa kryeministri përshëndeste një turmë në një qytet në qendër të Sllovakisë në maj 2024, përcjell A2CNN.
“Planifikimi i sulmit, i kombinuar me dijeninë se po sulmonte kryeministrin, tregon se ai duhet të ketë qenë i vetëdijshëm për efektin negativ në funksionimin e pushtetit qeveritar,” citohet të ketë thënë gjyqtari Petr Kana nga portali i lajmeve Dennik N në arsyetimin e vendimit.
Vendimi i Gjykatës së Lartë është përfundimtar, njoftoi agjencia e lajmeve TASR.
Gjykata nuk iu përgjigj menjëherë kërkesave për koment.
Sulmi i vitit 2024, i cili nxori në pah polarizimin e thellë politik në këtë vend të Europës Qendrore me rreth 5.4 milionë banorë, e la Ficon në gjendje kritike, por ai më vonë u rikuperua dhe iu rikthye detyrës.
(A2 Televizion)
A2 CNN Livestream
MUND TE LEXONI GJITHASHTU
