Forcat amerikane kanë goditur një tjetër anije që dyshohet se po transportonte drogë në Oqeanin Paqësor, mes një fushate në rritje të SHBA-së kundër kontrabandës së drogës në det.
Tre persona u vranë dhe asnjë forcë amerikane nuk u lëndua në sulmin e së mërkurës, tha Sekretari i Mbrojtjes Pete Hegseth. Sulmi vjen një ditë pasi SHBA-ja goditi një anije tjetër në Paqësor, duke vrarë dy persona.
Të dyja anijet besohet se transportonin drogë përgjatë rrugëve të njohura të trafikimit në ujërat ndërkombëtare, shtoi Hegseth.
"Sot, me urdhër të Presidentit Trump, Departamenti i Luftës kreu një tjetër sulm kinetik vdekjeprurës ndaj një anijeje të operuar nga një Organizatë e Caktuar Terroriste. Këto sulme do të vazhdojnë, ditë pas dite. Këta nuk janë thjesht trafikantë droge - këta janë narko-terroristë që sjellin vdekje dhe shkatërrim në qytetet tona", postoi Hegseth në X.
Postimi u shoqërua nga një video që duket se tregon një varkë që merr flakë pasi u godit nga një bombë amerikane.
Më pas shihen sende lundruese në ujë, përpara se të duken sikur janë shënjestër e një sulmi të dytë ajror.
Presidenti i SHBA-së, Donald Trump, tha se ka autoritetin ligjor për të vazhduar bombardimin e anijeve në ujëra ndërkombëtare, por tha se mund t'i drejtohet Kongresit të SHBA-së nëse vendos të zgjerojë objektivat për të zbarkuar.
Ky përbën sulmin e nëntë të tillë që nga 2 shtatori ndaj anijeve të dyshuara se transportojnë drogë, por të parat në ujërat e Oqeanit Paqësor. Shumica e sulmeve të SHBA-së kanë qenë në Detin e Karaibeve.
Të paktën 37 persona janë vrarë në sulmet amerikane ndaj anijeve të dyshuara për drogë, përfshirë një sulm të kohëve të fundit ndaj një anijeje gjysmë-nëndetëse në Karaibe.
Deri më sot, zyrtarët amerikanë kanë ofruar pak detaje mbi identitetin e të vrarëve në sulme ose se cilave organizata të trafikut të drogës dyshohet se u përkasin.
Rreth 10,000 trupa amerikane, si dhe dhjetëra avionë dhe anije ushtarake, janë vendosur në Karaibe si pjesë e operacionit. (A2 Televizion)
A2 CNN Livestream
MUND TE LEXONI GJITHASHTU
