Presidenti amerikan Donald Trump njoftoi se ka urdhëruar rindërtimin dhe rihapjen e burgut të Alcatrazit, burgut famëkeq federal të vendosur në një ishull të vogël në Kaliforni, i cili u mbyll gjashtëdhjetë vjet më parë. Në një postim në Truth, presidenti amerikan tha se burgu do të strehojë kriminelët më të pamëshirshëm dhe të dhunshëm të Amerikës.
“Po i drejtohem Byrosë së Burgjeve, së bashku me Departamentin e Drejtësisë, FBI-në dhe Sigurinë Kombëtare, që të rihapin një ALCATRAZ të zgjeruar dhe të rindërtuar në mënyrë të konsiderueshme, për të strehuar shkelësit më të pamëshirshëm dhe të dhunshëm të Amerikës. Ne nuk do të mbahemi më peng të kriminelëve, banditëve dhe gjyqtarëve që kanë frikë të bëjnë punën e tyre dhe na lejojnë të largojmë kriminelët që kanë hyrë ilegalisht në vendin tonë. Rihapja e ALCATRAZ do të shërbejë si një simbol i Ligjit, Rendit dhe DREJTËSISË”, shkroi presidenti në një postim në Truth Social.
Presidenti u tha gazetarëve, ndërsa u kthye në Shtëpinë e Bardhë të dielën më vonë, se ishte "vetëm një ide" që i kishte ardhur për shkak të "gjyqtarëve të radikalizuar" që duan të sigurojnë që migrantët që deportohen të kenë një proces të rregullt ligjor.
Duke folur më vonë me gazetarët në Uashington, presidenti theksoi se kjo ishte “vetëm një ide”, e nxitur nga zhgënjimi ndaj gjyqtarëve që, sipas tij, po pengojnë dëbimin e migrantëve ilegalë duke këmbëngulur në gjyqe individuale për çdo rast.
“Mendoj se për shkak se kaq shumë prej këtyre gjyqtarëve të radikalizuar, ata duan të kenë gjyqe për… çdo person që ndodhet ilegalisht në vendin tonë”, tha ai, duke shtuar, “kjo do të thoshte miliona gjyqe”.
Trump e përshkroi Alcatraz-in si një simbol të frikshëm por të nevojshëm të autoritetit, duke nënvizuar historinë e tij si një burg famëkeq për kriminelë të rrezikshëm.
Alcatraz, i vendosur në një ishull pranë bregdetit të San Franciskos, funksionoi si një burg federal për gati 30 vjet para se të mbyllej në vitin 1963 "sepse institucioni ishte shumë i shtrenjtë për të vazhduar funksionimin", sipas faqes së internetit të Byrosë së Burgjeve .
Rreth 3 deri në 5 milionë dollarë “nevojiteshin vetëm për punimet e restaurimit dhe mirëmbajtjes për ta mbajtur burgun të hapur”, pa përfshirë kostot e përditshme të funksionimit. “Alcatraz ishte pothuajse tre herë më i shtrenjtë për t’u operuar sesa çdo burg tjetër federal”, sipas faqes së internetit.
Tani operohet nga Shërbimi i Parkut Kombëtar si një destinacion turistik, duke mirëpritur afërsisht 1.2 milion vizitorë në vit.
Ideja e Trump ka shkaktuar debat, ndërsa kritikët e shohin si një përpjekje për të ringjallur politikat më të ashpra të administratës së tij të mëparshme për sigurinë publike dhe imigracionin. (A2 Televizion)
A2 CNN Livestream
MUND TE LEXONI GJITHASHTU
