Zyrtarët në Japoni kanë paralajmëruar për një rrezik në rritje të një tërmeti “të madh” javën e ardhshme, pasi një tërmet me magnitudë 7.7 goditi bregun verilindor, duke shkaktuar një urdhër evakuimi dhe paralajmërime për valë cunami 3 metra.
Mijëra njerëzve iu tha të largoheshin nga zonat bregdetare për në vende më të larta pas tërmetit në ujërat pranë prefekturës Iwate, 530 km në veri të kryeqytetit Tokio.
Valët më të mëdha të cunamit ishin 80 cm të larta. Paralajmërimet dhe njoftimet për cunami u hoqën disa orë pas tërmetit të hënën.
Por agjencia meteorologjike e Japonisë ka paralajmëruar se tërmete “që shkaktojnë dridhje edhe më të forta” mund të ndodhin javën e ardhshme, duke prodhuar valë më të mëdha.
Autoritetet thanë se rreziku i një tërmeti me magnitudë 8.0 ishte "relativisht më i lartë se gjatë kohërave normale".
Pas tërmetit nënujor të së hënës, i regjistruar në një thellësi prej 10 km, banorëve në zonat më afër epiqendrës, në ishullin kryesor të Japonisë, Honshu, dhe në rajonin verior të Hokkaido-s, iu lëshuan paralajmërime për valë të mundshme më të mëdha. Dridhjet u ndjenë deri në Tokio.
Njerëzit në Japoni janë ende të prekur nga kujtimet e një tërmeti të fuqishëm në vitin 2011, i cili shkaktoi një cunami që vrau më shumë se 18,000 njerëz dhe shkaktoi një shkrirje të termocentralit bërthamor të Fukushimës.
Vendndodhja e pasigurt e Japonisë në Unazën e Zjarrit do të thotë se ajo përjeton rreth 1,500 tërmete në vit dhe përbën 10% të tërmeteve me magnitudë 6.0 ose më të lartë në të gjithë botën.
(A2 Televizion)
A2 CNN Livestream
MUND TE LEXONI GJITHASHTU
