Kapen 18 anije të flotlijes për në Gaza, momenti kur ushtria izraelite mësyn anijen greke "Oxygeno"

Forcat e Marinës Izraelite kryen një bastisje në anijen greke "Oxygeno", e cila po merrte pjesë në misionin ndërkombëtar Global Sumud Flotilla me destinacion Gazën. Anija, e cila mbante ndihma humanitare së bashku me aktivistë, u ndalua ndërsa lundronte drejt vijës bregdetare të enklavës palestineze.

Gjithsej 19 nga 44 anijet në flotilje janë ndaluar nga forcat izraelite, të cilat u bënë thirrje atyre që ishin në bord të ndryshonin menjëherë kursin dhe të shkarkonin ngarkesën e tyre në një port izraelit.

Në të njëjtën kohë, dhjetëra anije të tjera vazhdojnë kursin e tyre, duke iu afruar Gazës pavarësisht ndërhyrjeve të përsëritura.

"Anija Oxygonos është kapur nga forcat izraelite në një akt piraterie ndërkombëtare dhe në shkelje të së Drejtës Ndërkombëtare dhe Ligjit të Detit. Shokët tanë aktualisht po rrëmbehen dhe po çohen në një vend të panjohur kundër vullnetit të tyre. Ne kërkojmë që qeveria greke të garantojë kthimin e tyre të menjëhershëm dhe të sigurt në vend", thanë aktivistët e anijes greke "Oxygonos".

Më herët, Peti Perka, një deputete e së Majtës së Re që ndodhej në anijen "Oxygono", publikoi një video në Instagram në të cilën raporton se u shfaqën anije luftarake izraelite.

"Për një moment, ne besuam, donim të besonim se do të ishim në gjendje të ishim në Gaza nesër në mesditë dhe të përqafonim këta fëmijë që na presin. Fatkeqësisht, siç e prisnim, anijet luftarake izraelite janë shfaqur 4 milje përpara anijeve të para. Kështu që po presim që ato të vijnë edhe tek ne."

Një tjetër anije greke, “Pavlos Fyssas”, po merr pjesë në misionin ndërkombëtar të ndihmës humanitare në Gaza dhe vazhdon të lundrojë.

Në një postim në platformën X, Flota Globale Sumud raportoi se “30 anije ende lundrojnë drejt Gazës, vetëm 46 milje detare larg, pavarësisht sulmeve të vazhdueshme nga marina izraelite.”

Zëdhënësi i flotës, Saif Abukesek, i tha Agjencisë France-Presse se forcat izraelite kishin kapur tashmë 13 anije që transportonin rreth 200 persona, shumë prej të cilëve nga Spanja dhe Italia.

Në një video të postuar në Instagram, Abukesek theksoi se "misioni ynë vazhdon", duke shtuar për anijet që mbeten në kurs se "ato janë të vendosura, të motivuara dhe po bëjnë gjithçka që është në fuqinë e tyre për të thyer rrethimin herët këtë mëngjes".

Midis anijeve të ndaluara ishte edhe ajo që mbante Greta Thunberg, e cila sipas autoriteteve izraelite është midis të arrestuarve. Informacioni u konfirmua nga Izraeli, i cili, nëpërmjet Ministrisë së Jashtme, raportoi se kishte ndaluar “disa anije”, pa shkaktuar ndonjë dëm, siç thotë ajo.

“Pasagjerët e tyre po transferohen në një port izraelit”, shkroi ministria në X dhe shtoi se “Greta dhe miqtë e saj janë shëndoshë e mirë”. (A2 Televizion)