Më shumë se 15,000 njerëz kanë dalë në rrugët e Izraelit për të kërkuar përfundimin e luftës në Gaza dhe për t'i bërë thirrje kryeministrit Benjamin Netanyahu të bjerë dakord për një marrëveshje për lirimin e pengjeve të mbetura.
Sipas mediave të huaja, familjet dhe mbështetësit e pengjeve që ende mbahen nga Hamasi mbushën Sheshin e Parisit në Jerusalem, ndërsa të tjerë u mblodhën në Tel Aviv.
Nga 48 pengjet që mbahen ende në Gaza, besohet se rreth 20 prej tyre janë ende gjallë, shkruan A2 CNN.
Izraeli ende nuk i është përgjigjur zyrtarisht një marrëveshjeje që do të sillte lirimin e disa pengjeve, por më parë ka kërkuar kthimin e të gjithë pengjeve në çdo marrëveshje.
Netanyahu këmbëngul se fitorja totale ndaj Hamasit do t'i kthejë pengjet në shtëpi, shkruan A2 CNN.
Hamasi mori 251 pengje në Gaza pas sulmit të tij në Izraelin jugor më 7 tetor 2023, në të cilin vdiqën rreth 1,200 njerëz.
Izraeli nisi një fushatë masive hakmarrjeje për të shkatërruar Hamasin, e cila ka rezultuar në vdekjen e të paktën 64,368 palestinezëve, sipas shifrave të Ministrisë së Shëndetësisë të drejtuar nga Hamasi. OKB-ja i konsideron shifrat të besueshme, megjithëse Izraeli i kundërshton ato.
Protestat në rrugët e Izraelit dhe kërkesat ndërkombëtare nga disa prej aleatëve të tij për të ndaluar ofensivën ushtarake në Gaza janë rritur vazhdimisht.
Megjithatë, të gjitha shenjat tregojnë se Forcat Mbrojtëse të Izraelit (IDF) po përgatiten të intensifikojnë luftën, ndërsa qeveria Netanyahu zotohet të fitojë kontroll të plotë të Rripit të Gazës dhe më në fund të mposhtë Hamasin. (A2 Televizion)
A2 CNN Livestream
MUND TE LEXONI GJITHASHTU
