Irani pranon disfatën e rëndë në betejën me Amerikën. Zëdhënësi i Ministrisë së Jashtme të Teheranit, Esmail Baghaei, tha se objektet bërthamore në Iran janë dëmtuar rëndë nga sulmet ajrore të Izraelit dhe Shteteve të Bashkuara. Por ai nuk specifikoi nëse dëmi ndodhi në objektet mbitokësore apo nëntokësore.
Vetë ministri i Jashtëm, Seyed Abbas Araghchi, tha se sulmet vetëm sa e kanë forcuar vendosmërinë e Iranit për të çuar përpara programin e tij bërthamor, sipas një raportimi nga media iraniane.
Ministri theksoi përpjekjet e konsiderueshme që Irani ka investuar në teknologjinë e tij bërthamore, duke vënë në dukje se shkencëtarët kanë bërë sakrifica të jashtëzakonshme, përfshirë dhënien e jetës së tyre për këtë kauzë. Ai tha më tej se askush në Iran nuk do të heqë dorë nga këto teknologji.
Shefi i Shtabit të Përgjithshëm të Forcave Mbrojtëse të Izraelit, Eyal Zamir, deklaroi se IDF ka arritur të gjitha qëllimet e saj pas 12 ditësh sulmesh ndaj Iranit, duke shkatërruar programin bërthamor. Përballë këtyre pohimeve, Komandanti i Korpusit të Gardës Revolucionare Islamike, Gjenerali Mohammad Pakpour, lëshoi një kërcënim të fortë.
“Të gjithë luftëtarët tanë janë gati, me gishtat në këmbëz. Nëse armiku bën një gabim, do të përballet me një përgjigje të vendosur dhe të fuqishme - ashtu siç u përball gjatë dymbëdhjetë ditëve të fundit. Kur bëhet fjalë për mbrojtjen e këtij vendi, ne nuk hezitojmë për asnjë moment”, u shpreh Pakpour.
Fushata e bombardimeve të Izraelit ndaj Iranit, e nisur me një sulm të papritur më 13 qershor, shkatërroi nivelin më të lartë të udhëheqjes ushtarake iraniane, vrau shkencëtarët e saj kryesorë bërthamorë dhe shënjestroi lokacione bërthamore.
Irani u përgjigj me raketa që shpuan mbrojtjen e Izraelit në numër të madh për herë të parë. Pas 12 ditësh luftë, një armëpushim u arrit me ndërmjetësimin e Presidentit të SHBA-së Donald Trump midis Iranit dhe Izraelit, pas sulmit të fuqishëm amerikan të së shtunës. (A2 Televizion)
A2 CNN Livestream
MUND TE LEXONI GJITHASHTU
