SHBA-ja dhe Kina kanë rënë dakord për kornizën e një marrëveshjeje të mundshme tregtare që do të diskutohet kur udhëheqësit e tyre përkatës të takohen më vonë këtë javë, tha Sekretari amerikan i Tregtisë.
Scott Bessent deklaroi për CBS se kjo përfshinte një "marrëveshje përfundimtare" mbi operacionet e TikTok në SHBA dhe një shtyrje të kontrolleve të shtrënguara të Kinës mbi mineralet e rralla të tokës.
Ai tha gjithashtu se nuk parashikonte që tarifa 100% mbi mallrat kineze të hynte në fuqi, ndërsa Kina do të rifillojë blerjet e konsiderueshme të sojës nga SHBA-ja. Të dy vendet po kërkojnë të shmangin përshkallëzimin e mëtejshëm të një lufte tregtare midis dy ekonomive më të mëdha në botë.
Trump dhe Presidenti kinez Xi Jinping do të zhvillojnë bisedime të enjten, në Korenë e Jugut.
Bessent u takua me zyrtarë të lartë kinezë të tregtisë në margjinat e samitit të Shoqatës së Kombeve të Azisë Juglindore (ASEAN) në Malajzi, në të cilin Trump po merr pjesë gjithashtu si pjesë e një turneu në Azi. Pekini tha se ata patën diskutime "konstruktive".
Bessent tha se vendet kishin "arritur një kornizë të konsiderueshme për të dy udhëheqësit", duke shtuar: "Tarifat do të shmangen".
Që kur Trump u rikthye në Shtëpinë e Bardhë, ai ka vendosur dhe kërcënuar me tarifa gjithëpërfshirëse për importet nga jashtë.
Por, taksat më të larta që ai ka kërcënuar i janë drejtuar Kinës. Pekini është kundërpërgjigjur me masat e veta, megjithëse të dy ranë dakord të shtyjnë zbatimin e taksave ndërsa ndjekin një marrëveshje tregtare.
Megjithatë, Trump kërcënoi me tarifa të reja 100% për mallrat kineze nga nëntori nëse Kina nuk i heq kufizimet e saj të shtrënguara për eksportin e metaleve të rralla, materiale thelbësore për prodhimin e elektronikës.
Kina përpunon rreth 90% të metaleve të rralla në botë, të cilat përdoren në gjithçka, nga panelet diellore deri te telefonat inteligjentë, duke e bërë furnizimin e tyre për prodhuesit amerikanë një mjet kyç negociues.
(A2 Televizion)
A2 CNN Livestream
MUND TE LEXONI GJITHASHTU
