Ministri i Jashtëm spanjoll Jose Manuel Albares thotë se “nuk ka prova” që mbështesin akuzat izraelite kundër dy aktivistëve të ndaluar, të cilët u kapën ndërsa ishin në një flotilje që përpiqej të dërgonte ndihma në Gaza.
Autoritetet izraelite i akuzojnë dy burrat për “bashkëpunim me armikun në kohë lufte”, kontakt me një agjent të huaj dhe mbështetje të një “organizate terroriste”.
“Nuk ka asnjë provë apo lidhje me atë që pretendojnë autoritetet izraelite,” tha Albares për transmetuesin publik spanjoll RTVE.
Spanjollo-palestinezi Saif Abu Keshek dhe shtetasi brazilian Thiago Avila u ndaluan nga forcat izraelite në ujëra ndërkombëtare pranë ishullit grek të Kretës, rreth 1,000 km (540 milje detare) larg Gazës, përcjell A2CNN.
Albares tha se Spanja dhe Brazili po koordinojnë një përgjigje të përbashkët, por nuk pranoi të specifikojë masat e mundshme. “Nuk dua të them asgjë që mund të përkeqësojë situatën e Saif-it,” tha ai, duke shtuar se asnjë nga dy vendet nuk do t’i “braktisë” qytetarët e vet.
Ai i përshkroi arrestimet si “plotësisht të paligjshme”.
“Nuk sulmohet një anije në ujëra ndërkombëtare. Kjo nuk është mënyra se si duhet të veprojë një shtet që e quan veten demokratik,” tha Albares. (A2 Televizion)
A2 CNN Livestream
MUND TE LEXONI GJITHASHTU
