Ukraina ka të drejtë që të godasë Rusinë brenda territorit të saj. Kështu është shprehur Sekretari i Jashtëm i Britanisë së Madhe, David Cameron. Në një intervistë për Reuters, Cameron tha se i takon Ukrainës të vendosë se si do të përdoren armët e Mbretërisë së Bashkuar.
“Përsa i përket asaj që bëjnë ukrainasit, është vendimi i tyre se si t'i përdorin këto armë. Ata po mbrojnë vendin e tyre, ata u pushtuan ilegalisht nga Putini dhe ata duhet t'i ndërmarrin ato hapa. Rusia ka nisur një sulm në Ukrainë dhe Ukraina ka absolutisht të drejtën të sulmojë Rusinë”, tha David Cameron.
I pyetur nëse armët britanike do të përfshijnë objektiva brenda Rusisë, ai tha se Ukraina e ka këtë të drejtë, por do të varet nga vetë Kievi se si do t’i përdorë.
Kremlini i sheh deklaratat e Sekretarit të Jashtëm britanik David Cameron për të drejtën e Kievit për të përdorur armët britanike për të goditur Rusinë si “një përshkallëzim të drejtpërdrejtë” që “mund të përbëjë potencialisht një rrezik për sigurinë evropiane”. Kështu tha zëdhënësi Dmitri Peskov, citon agjencia e lajmeve ruse Tass.
Ndërsa zëdhënësja e Ministrisë së Jashtme ruse, Maria Zakharova, shtoi: “Kjo është hera e parë që një politikan perëndimor e ka pranuar kaq sinqerisht atë që ka qenë prej kohësh një sekret i njohur për shumicën e vendeve të botës: që Perëndimi po bën një luftë të fshehtë kundër Rusisë me duart e ukrainasve. Sa i papërgjegjshëm dhe i pashpirt duhet të jeni për të mos kuptuar se në çfarë çojnë deklarata të tilla, veçanërisht në lidhje me vendet me armë bërthamore”.
Komentet e Cameron e vendosin Britaninë në një pozicion më të ashpër ndaj Rusisë sesa Shtetet e Bashkuara, e cila përcakton se çdo armë që ajo i jep Ukrainës duhet të përdoret vetëm brenda kufijve të njohur ndërkombëtarisht të Ukrainës dhe jo kundër objektivave brenda vetë Rusisë. (A2 Televizion)
A2 CNN Livestream
MUND TE LEXONI GJITHASHTU
