Orë zjarri mes Ukrainës dhe Rusisë. Forcat e armatosura në Kiev njoftuan se kishin goditur një rafineri nafte në Orsk të Rusisë, 1 500 kilometra larg frontit të luftës. Sipas autoriteteve ukrainase, sulmi i ndërmarrë me raketa me rreze të gjatë në thellësi të territorit rus kishte shënjestruar një prej rafinerive më të mëdha të naftës në rajonin e Orenburgut. Siç thuhet, një zjarr ishte raportuar në zonë.
Presidenti Zelenski ka thënë së fundmi se sulmet ndaj infrastrukturës energjetike synojnë të kufizojnë të ardhurat nga nafta, të cilat Moska i përdor për të financuar luftën.
Kievi ndërmori gjithashtu një tjetër sulm me dronë kundër Rusisë, që shkaktoi zjarr në një fabrikë të Wildberries në Voronezh, e njohur si kompania Amazon e Rusisë, shkruan A2 CNN. Sulmet e reja vijnë një ditë pasi Ukraina vrau të paktën 13 persona dhe plagosi rreth 40 të tjerë në qytetin e Nizhnekamskut, në një prej bilanceve më të rënda civile për Rusinë.
Ndërkohë, Moska goditi Ukrainën me një valë të re bombardimesh, duke shkaktuar të paktën 9 viktima dhe dhjetëra të plagosur.
Tre persona u vranë në Zaporizhzhia, ku u lëshuan raketa dhe bomba të drejtuara nga ajri. Në kryeqytetin Kiev, kryebashkiaku Vitaliy Klitschko raportoi shpërthime të forta, teksa tha se kryeqyteti kishte qenë nën sulm balistik mbrëmjen e së hënës. Shërbimet e emergjencës thanë se një fabrikë kishte marrë zjarr dhe një person ishte plagosur.
Në rajonin lindor të Dnipropetrovskut u vranë tre persona dhe u plagosën pesë të tjerë në një sulm me dronë dhe artileri.
Shkëmbimi i zjarrit vjen teksa presidenti Volodimir Zelenski tha se Rusia kishte përdorur raketa balistike të Koresë së Veriut në sulme vdekjeprurëse kundër Zaporizhzhias. (A2 Televizion)
A2 CNN Livestream
MUND TE LEXONI GJITHASHTU
