Spanja kërkon që Bashkimi Europian t’i japë fund marrëveshjes së asociimit me Izraelin për shkak të shkeljeve të së drejtës ndërkombëtare, deklaroi kryeministri Pedro Sánchez.
“Të martën, qeveria e Spanjës do t’i paraqesë një propozim BE-së që Bashkimi Europian të ndërpresë marrëveshjen e asociimit me Izraelin,” tha Sánchez gjatë një tubimi politik në Andaluzi.
Ai theksoi se Izraeli “shkel të drejtën ndërkombëtare” dhe për këtë arsye “nuk mund të jetë partner i Bashkimit Europian, është kaq e thjeshtë”.
Spanja, Irlanda dhe Sllovenia dërguan një letër në Komisionin Europian të premten, duke kërkuar që marrëveshja me Izraelin të diskutohet në mbledhjen e ardhshme të ministrave të jashtëm të BE-së.
Marrëveshja e asociimit mes BE-së dhe Izraelit, e nënshkruar në qershor të vitit 2000, përfshin një klauzolë që kërkon respektimin e të drejtave të njeriut.
Spanja dhe Irlanda kishin kërkuar për herë të parë rishikimin e kësaj marrëveshjeje në vitin 2024, në mes të luftës në Gaza. Kryeministri spanjoll ka kritikuar gjithashtu sulmet e Izraelit ndaj Libanit.
Njohja nga Madridi e një shteti palestinez në vitin 2024 shkaktoi zemërim në Izrael, ndërsa Sánchez ka shtuar kritikat ndaj qeverisë së Benjamin Netanyahu që nga ajo kohë. (A2 Televizion)
A2 CNN Livestream
MUND TE LEXONI GJITHASHTU
