Kryeministri britanik Keir Starmer po përballet me presion në rritje brenda Partisë Laburiste, pas rezultateve të dobëta në zgjedhjet lokale dhe rënies së mbështetjes për qeverinë e tij.
Pavarësisht kritikave dhe thirrjeve për dorëheqje, Starmer ka deklaruar se mbetet i vendosur për të vazhduar drejtimin e vendit, duke e cilësuar qeverinë e tij si një “projekt 10-vjeçar” dhe duke premtuar ndryshime për të rikthyer besimin e votuesve.
Humbjet e mëdha të Laburistëve në zgjedhjet lokale, ku partia humbi mbi 1,400 vende në këshillat bashkiakë, kanë shtuar spekulimet për një garë të mundshme për lidershipin e partisë. Ndërkohë, partia Reform UK e Nigel Farage ka shënuar rritje të fortë të mbështetjes.
Mes emrave që përmenden si sfidues të mundshëm të Starmer janë Angela Rayner, Wes Streeting dhe Andy Burnham.
Angela Rayner, ish-zëvendëskryeministre dhe figurë e krahut të majtë të Laburistëve, konsiderohet një nga kandidatet më serioze për ta sfiduar Starmerin. Ajo ka kritikuar drejtimin aktual të partisë, duke deklaruar se “ajo që po bëjmë nuk po funksionon”.
Një tjetër emër i përfolur është ministri i Shëndetësisë, Wes Streeting, i cili shihet si një figurë me mbështetje të konsiderueshme brenda partisë dhe si një komunikues i fortë politik.
Ndërsa Andy Burnham, kryebashkiaku i Greater Manchester, vazhdon të mbetet një nga figurat më popullore të Laburistëve në sondazhe, edhe pse aktualisht nuk është deputet dhe nuk mund të hyjë menjëherë në garë për lidership.
Për të nisur një garë zyrtare për kreun e Partisë Laburiste, nevojitet mbështetja e të paktën 20% të deputetëve laburistë në Parlament.
Kriza politike vjen në një moment të vështirë për Starmerin, i cili po përballet me pakënaqësi për çështjet e emigracionit, ekonomisë dhe menaxhimin e figurave të diskutueshme brenda qeverisë së tij. (A2 Televizion)
A2 CNN Livestream
MUND TE LEXONI GJITHASHTU
