Protesta masive kundër të djathtës ekstreme në Francë, 100.000 marshojnë në Paris

Në Francë kanë nisur protesta masive kundër të djathtës ekstreme, në një kohë kur vendi ka nisur përgatitjet për zgjedhjet e parakohshme, pasi presidenti Emmanuel Macron shpërndau Asamblenë Kombëtare sepse partia e tij humbi zgjedhjet europiane.

Në Paris, deri në 100,000 njerëz pritet të dalin në rrugë në tubimin kundër fashizmit që do të fillojë në orën 16:00 nga Place de la Republique.

150 demonstrata priten në të gjithë vendin, duke përfshirë edhe qytete si Marseja, Tuluza, Lioni dhe Lila, teksa qytetarët janë në alarm pas rritjes së ekstremit të djathtë, me partinë RN të Marine Le Pen që synon të rrëzojë Macron nga pushteti.

Policia thotë se 350,000 francezë do të marshojnë në rrugët e mbarë vendit dhe 21,000 policë janë mobilizuar pasi sindikatat, grupet studentore dhe grupet e të drejtave të njeriut bënë thirrje për mitingje masive.

Një seri e parë e sondazheve tregon se RN e ekstremit të djathtë mund të fitojë zgjedhjet parlamentare dhe të jetë në gjendje të formojë një qeveri.

Një sondazh i revistës Point i publikuar dje, parashikon se RN do të dalë e para në raundin e parë të zgjedhjeve parlamentare me 29.5% të votave, vetëm pak larg nga një koalicion partish të krahut të majtë të quajtur Fronti Popullor që pritet të marrë 28,5 %, ndërsa kampi qendror i Macron mbledh 18%. (A2 Televizion)