Një avion privat që udhëtonte nga Austin i Teksasit për në Bahamas u rrëzua në tokë në Qarkun Palm Beach të Floridës, të dielën pasdite, duke lënë një krater të thellë dhe mbeturina që digjeshin vetëm pak metra larg shtëpive dhe bizneseve aty pranë. Si rezultat u vranë të nëntë personat në bord.
Videoja nga një automjet që kalonte tregon avionin reaktiv, një Learjet 60, duke u përplasur në tokë.
“Ishte një përplasje avioni kataklizmike”, tha Guvernatori i Floridës, Ron DeSantis. “Duket sikur një raketë po binte.” Nuk pati raportime të menjëhershme për ndonjë person të lënduar në tokë.
Para rrëzimit, piloti raportoi se në aeroplan po grumbullohej akull, me një temperaturë ajri të jashtëm prej -47 gradë Celsius dhe turbulencë të moderuar, duke e përplasur aeroplanin deri në 700 metra lartësi. Më pak se një minutë më vonë, personi tha "Mayday, mayday", duke raportuar se avioni po ulej papritur me një shpejtësi prej 10,000 metrash në minutë.
Bordi Kombëtar i Sigurisë së Transportit tha se kishte nisur një hetim për aksidentin, të cilin Sekretari i Transportit Sean Duffy e quajti një "tragjedi të tmerrshme".
Zyrtarët amerikan nuk kanë thënë se çfarë e shkaktoi rrëzimin e avionit dhe nuk i kanë identifikuar nëntë personat që vdiqën, as nuk kanë thënë se sa prej tyre ishin pasagjerë dhe anëtarë të ekuipazhit.
Aksidenti shënon tragjedinë e dytë më vdekjeprurës ajror në Shtetet e Bashkuara këtë vit, pasi 12 persona vdiqën në qershor kur një aeroplan parashutist u rrëzua në Butler, Missouri. Është gjithashtu aksidenti më i rëndë që përfshin një Learjet 60, sipas të dhënave nga Fondacioni i Sigurisë së Fluturimit. Në vitin 2008, katër persona u vranë kur një Learjet 60 që po udhëtonte për në Los Angeles u rrëzua gjatë ngritjes nga Kolumbia, Karolina e Jugut. (A2 Televizion)
A2 CNN Livestream
MUND TE LEXONI GJITHASHTU
