Për herë të parë në historinë 116-vjeçare të Shërbimit të Inteligjencës së Jashtme të Britanisë (MI6), drejtimin e këtij institucioni do ta marrë një grua. Blaise Metreweli, e cila iu bashkua MI6 në vitin 1999, do të zëvendësojë Sir Richard Moore në postin e kreut të shërbimit.
Metreweli, 47 vjeç, aktualisht është drejtore e departamentit të teknologjisë dhe inovacionit në MI6 dhe njihet për kontributin e saj në mbrojtjen e identiteteve të agjentëve dhe luftimin e mbikëqyrjes biometrike nga shtete si Kina. Ajo shprehu krenari për emërimin, duke e cilësuar si një nder të madh dhe një përgjegjësi të rëndësishme.
Kryeministri Keir Starmer e cilësoi emërimin si "historik", ndërsa theksoi rëndësinë jetike që ka puna e shërbimeve të inteligjencës në kohët e sotme. Metreweli do të raportojë drejtpërdrejt te Sekretari i Jashtëm, David Lammy, i cili e përshkroi atë si kandidaturën "ideale" për të përballuar sfidat globale.
MI6 është përgjegjëse për mbledhjen e inteligjencës jashtë vendit me qëllim sigurimin e Britanisë, duke luftuar terrorizmin, aktivitetet e shteteve armiqësore dhe kërcënimet kibernetike.
"C", siç njihet publikisht kreu i MI6, është i vetmi anëtar i këtij shërbimi që identifikohet me emër dhe gjithmonë nënshkruan me bojë të gjelbër, një traditë që daton që nga drejtori i parë, Kapiteni Mansfield Cumming.
Metreweli ka një karrierë të gjatë në inteligjencë, duke përfshirë edhe pozita në MI5 dhe eksperiencë të gjerë në Lindjen e Mesme dhe Evropë. (A2 Televizion)
A2 CNN Livestream
MUND TE LEXONI GJITHASHTU
