Një zjarr i madh përfshiu një qendër të madhe tregtare në qytetin lindor të Irakut, Kut, duke vrarë dhjetëra persona dhe duke shkatërruar një komunitet të tërë. Të paktën 61 persona - përfshirë burra, gra dhe fëmijë - vdiqën në flakët në hipermarketin pesëkatësh Al-Kornish, dhe dhjetëra të tjerë u shpëtuan nga ndërtesa që po digjej, sipas një deklarate nga Ministria e Brendshme e Irakut të enjten në mëngjes. “Ky zjarr u mori jetën e 61 qytetarëve të pafajshëm, shumica e të cilëve vdiqën nga mbytja në banjë për shkak të tymit të dendur”, tha ministria e brendshme, duke shtuar se ishte “një incident thellësisht tragjik që ka tronditur ndërgjegjen kolektive (të Irakut). Trupat e 14 personave mbetën të paidentifikuar, tha ajo.
Pamjet video të publikuar nga CNN treguan ndërtesën e përfshirë nga flakët, me një grup njerëzish të mbledhur në çati ndërsa zjarrfikësit luftuan me flakët. Njerëzit u panë duke u ndihmuar përmes dritareve të vogla nga ekipet e emergjencës në një video tjetër nga autoritetet rajonale.
“Pavarësisht ashpërsisë së situatës, ekipet e Mbrojtjes Civile arritën heroikisht të shpëtonin më shumë se 45 persona të bllokuar brenda ndërtesës, me një përkushtim dhe guxim të jashtëzakonshëm”, tha ministria e brendshme.
Kryeministri i Irakut Mohammed Shia al-Sudani kërkoi dërgimin e një ekipi mjekësor të pajisur plotësisht për të mbështetur përpjekjet e shpëtimit dhe udhëzoi Ministrin e Brendshëm që të nisë menjëherë një hetim për shkakun e zjarrit, sipas një deklarate të lëshuar nga zyra e tij.
Al-Sudani u shprehu ngushëllimet e tij të sinqerta familjeve të të vrarëve dhe u lut që ata të gjejnë ngushëllim, thuhet në deklaratë. Ministri i Brendshëm Abdul Amir Al-Shammari tha se një komitet hetimor i nivelit të lartë do të “identifikojë të gjitha pikat e dështimit dhe përgjegjësinë” dhe se çdo palë “e gjetur neglizhente” do të mbahet përgjegjëse.
Tre ditë zie për viktimat janë shpallur në rajonin Wasit, tha guvernatori lokal, Mohammed Jameel Al-Mayahi, në një postim në Facebook.
Iraku ka parë incidente të ngjashme vdekjeprurëse në të kaluarën, shpesh të atribuuara mungesës së respektimit të rregulloreve të mbrojtjes civile, masave të dobëta të sigurisë dhe qarqeve të shkurtra elektrike. Në prill të vitit 2021, një zjarr në Spitalin Ibn al-Khatib në Bagdad mori jetën e më shumë se 80 pacientëve në një repart izolimi për COVID-19 kur shpërthyen bombolat e oksigjenit. Në shtator të vitit 2023, një zjarr shpërtheu në një sallë dasmash në Qaraqosh në Irakun verior, duke vrarë të paktën 100 persona dhe duke plagosur 150 të tjerë. (A2 Televizion)
A2 CNN Livestream
MUND TE LEXONI GJITHASHTU
