Një valë e paprecedentë emigrantësh ka përfshirë enklavën spanjolle të Ceutës në Afrikën e Veriut. Sipas autoriteteve spanjolle, rreth 49 mijë persona kanë hyrë në territor nga Maroku brenda vetëm 24 orëve, duke kaluar kufirin si në rrugë tokësore, ashtu edhe me not në det. Pamjet e publikuara në rrjetet sociale dhe mediat ndërkombëtare tregojnë mijëra njerëz duke notuar drejt brigjeve të Ceutës, ndërsa kalimet kanë vijuar edhe gjatë natës.
Autoritetet bëjnë të ditur se të paktën 19 emigrantë kanë humbur jetën ditët e fundit gjatë përpjekjes për të mbërritur në territorin spanjoll.
Mes personave që kanë hyrë ilegalisht në Ceutë, rreth 7 mijë janë të mitur. Përballë situatës, qeveria spanjolle ka dërguar forcat e armatosura për të forcuar sigurinë në Ceutë dhe në enklavën tjetër spanjolle, Melilla, ku janë regjistruar edhe qindra kalime të tjera.
Ndërkohë, autoritetet marokene hodhën ujë dhe përforcuan masat e sigurisë, duke zmbrapsur vazhdimisht migrantët që përpiqeshin t’u afroheshin hyrjeve. Një autobus u dogj dhe shtatë automjete u shkatërruan gjatë përplasjeve të policisë me turmën.
Kjo valë migratore vjen pak javë pasi Gjykata e Lartë e Spanjës vendosi se emigrantët e ndaluar në det nuk mund të kthehen menjëherë në Marok pa procedurat përkatëse ligjore.
Ministria e Brendshme e Spanjës njoftoi se po bashkëpunon me autoritetet marokene për kthimin sa më të shpejtë të personave që kanë hyrë në mënyrë të paligjshme, ndërsa kryeministri Pedro Sánchez pritet të vizitojë Ceutën për të ndjekur nga afër zhvillimet. (A2 Televizion)
A2 CNN Livestream
MUND TE LEXONI GJITHASHTU
