Ukraina ka ndërmarrë një seri sulmesh në territorin rus, duke goditur dy rafineri nafte dhe disa anije në Detin e Zi, në një përpjekje për të dëmtuar kapacitetet ekonomike dhe ushtarake të Moskës.
Presidenti ukrainas Volodymyr Zelensky deklaroi se objektivat e sulmeve ishin rafineritë Bashneft-Novoil në Bashkortostan dhe Slavneft-Yanos në rajonin e Yaroslavl-it, me synimin për të kufizuar të ardhurat nga eksporti i naftës, të cilat sipas Kievit përdoren për financimin e luftës.
Guvernatori i Yaroslavl-it, Mikhail Evraev, bëri të ditur se rafineria Slavneft-Yanos u përfshi nga flakët pas një sulmi me dronë, të cilin e cilësoi si më të madhin e këtij lloji në atë zonë. Sipas tij, katër persona mbetën të plagosur.
Zelensky tha gjithashtu se forcat ukrainase kanë goditur dy anije patrullimi ushtarake dhe anije të flotës në hije në Detin e Zi, duke iu referuar mjeteve detare të përdorura nga Rusia për transportin e naftës nën sanksione.
Ndërkohë, Moska raportoi se ka rrëzuar 605 dronë ukrainas gjatë natës në disa rajone të vendit, ndërsa ushtria ruse tha se ka goditur objekte të karburantit, energjisë dhe transportit në Ukrainë.
Nga ana tjetër, autoritetet ukrainase njoftuan se sulmet ruse kanë shkaktuar viktima dhe dëme të mëdha në infrastrukturë. Në qytetin Balakliya, në rajonin e Kharkivit, tre persona u vranë nga një sulm me dron, ndërsa dy persona të tjerë humbën jetën në një sulm ndaj një stacioni hekurudhor në Lozova. Në total, disa persona mbetën të plagosur.
Në qytetin e Khersonit, infrastruktura kritike u dëmtua nga sulmet ruse, duke lënë pa energji elektrike banorët e zonës. Ndërkohë, në portin e Odesës, një sulm rus ndaj anijeve të mallrave shkaktoi një viktimë.
Sulmet e fundit tregojnë përshkallëzimin e përballjes mes dy vendeve, ndërsa përpjekjet diplomatike për t’i dhënë fund luftës vijojnë pa një rezultat konkret.
(A2 Televizion)
A2 CNN Livestream
MUND TE LEXONI GJITHASHTU
