Zelensky pritet nga Presidenti Macron në kryeqytetin francez

Presidenti i Ukrainës, Volodymyr Zelenskyy, ka mbërritur në Pallatin Elysee në Paris dhe po përshëndetet nga homologu Emmanuel Macron.

Sipas mediave të huaja, Presidenti ukrainas ndodhet në Francë përpara një samiti të liderëve evropianë për Ukrainën.

Zyrtarët thanë se diskutimet e mëparshme në takimin në Paris do të përqendroheshin në një sërë çështjesh, të tilla si se si të forcohet Ukraina ushtarakisht për të penguar sulmet e ardhshme dhe si të monitorohen armëpushimet e kufizuara mbi objektivat detare dhe infrastrukturën energjetike.

Kujtojmë se ditën e djeshme SHBA njoftoi se kishte arritur një marrëveshje me Rusinë dhe Ukrainën për t’i dhënë fund luftimeve në Detin e Zi, por më pas Rusia vendosi si kusht heqjen e sanksioneve për të vënë në jetë këtë dakordësi, shkruan A2 CNN.

Megjithë premtimet dhe lëvizjet e administratës së Presidentit të SHBA-ve, Donald Trump, për të arritur armëpushimin në luftën në Ukrainë, një gjë e tillë ende nuk është arritur. (A2 Televizion)