Izraeli po përgatitet për të kryer fazën finale të ekspansionit në Rripin e Gazës. Burime diplomatike dhe ushtarake për median amerikane CNN, bëjnë me dije se, Kryeministri i Izraelit, Benjamin Netanyahu do të takohet me zyrtarët më të lartë të mbrojtjes ditën e premte për të finalizuar planin.
Ministri i Mbrojtjes së Izraelit, Israel Katz dhe Shefi i Shtabit, Ejal Zamir e kanë aprovuar paraprakisht planin duke rritur në mënyrë të dukshme luftën në Gaza, thekson CNN.
Zyrtarë të lartë izraelitë kanë paralajmëruar për javë të tëra se ushtria do të zgjerojë operacionet e saj në territorin e rrethuar nëse nuk ka marrëveshje për armëpushim. Izraeli thotë se bombardimi i Gazës, i shoqëruar me një bllokadë totale dymujore, është një përpjekje për të ushtruar presion ndaj Hamasit për të bërë lëshime në negociatat e armëpushimit.
“Presioni mbi Hamasin për të realizuar marrëveshjen është i fortë dhe tensioni mes tij dhe popullatës lokale po rritet”, thonë burime ushtarake izraelite për CNN.
Në fund të marsit, banorët e Gazës morën pjesë në ato që dukej të ishin protestat më të mëdha kundër Hamasit që nga fillimi i luftës. Në fillim të prillit, Netanyahu tha se lufta në Gaza ka "ndërruar ingranazhet".
"Tani po ndajmë planin dhe po rrisim presionin hap pas hapi, në mënyrë që ata të na japin pengjet tona. Dhe për sa kohë që nuk na i japin, presioni do të rritet derisa ta bëjnë", tha ai në një fjalim video.
Sakaq, Gaza vijon të jetë në kaos dhe të vuajë nga uria. Rritja e plaçkitjeve të dyqaneve ushqimore dhe kuzhinave të komunitetit në Rripin e Gazës tregon një dëshpërim në rritje, ndërsa uria përhapet dy muaj pasi Izraeli ndërpreu furnizimet në territorin palestinez.
Banorët palestinezë dhe zyrtarët e ndihmës thanë se të paktën pesë incidente plaçkitjeje ndodhën në të gjithë enklavën të mërkurën, duke përfshirë kuzhinat e komunitetit, dyqanet e tregtarëve dhe kompleksin kryesor të agjencisë palestineze të refugjatëve të OKB-së (UNRWA) në Gaza. (A2 Televizion)
A2 CNN Livestream
MUND TE LEXONI GJITHASHTU
