Ish-deputeti i Kuvendit të Republikës së Kosovës, Gramos Agusholli, është ndaluar paraditen e sotme nga autoritetet serbe në pikën kufitare në Merdarë, teksa ishte në tranzit drejt Sllovenisë.
Lajmin e ka konfirmuar Ministria e Punëve të Jashtme dhe Diasporës, sipas të cilës menjëherë pas ndalimit, Zyra Ndërlidhëse e Kosovës në Serbi ka informuar misionet diplomatike të shteteve të KUINT-it dhe Zyrën e Bashkimit Evropian në Beograd.
Në të njëjtën kohë, MPJD ka informuar edhe përfaqësitë diplomatike të këtyre shteteve dhe Zyrën e BE-së në Kosovë. Ministria ka nisur procedurat për sigurimin e informacioneve të plota dhe zyrtare rreth ndalimit të Agushollit.
Në reagimin e saj, MPJD e ka cilësuar ndalimin si një veprim arbitrar dhe represiv, që bie ndesh me të drejtën ndërkombëtare dhe me konventat ndërkombëtare për të drejtat e njeriut. Ajo i ka bërë thirrje Bashkësisë Ndërkombëtare që të reagojë urgjentisht dhe të kërkojë lirimin e menjëhershëm të ish-deputetit.
“Praktika të tilla përbëjnë shkelje të rëndë të parimeve themelore të lirisë së lëvizjes dhe janë të papranueshme për një shtet që aspiron integrimin evropian,” thuhet në reagimin e MPJD-së.
Ministria ka siguruar se do të mbajë të informuar opinionin dhe partnerët ndërkombëtarë për çdo zhvillim të mëtejshëm lidhur me këtë rast. (A2 Televizion)
A2 CNN Livestream
MUND TE LEXONI GJITHASHTU
