17 intervista dëshmitarësh e muaj të tërë punë, përmblidhen të gjitha në një raport prej 300 faqesh, të demokratëve në Dhomën e Përfaqësuesve.
Paneli që zhvilloi hetimet, tha se provat për abuzime nga ana e presidentit Donald Trump janë dërrmuese, dhe se veprimet e tij ndaj Ukrainës kishin kompromentuar sigurinë kombëtare.
“Ky raport tregon skemën e përdorur nga Trump për të detyruar një aleat të përfshihet në punët e pista të presidentit”, tha Adam Schiff, kryetar i komisionit të inteligjencës.
Raporti ndahet në dy seksione. Njëri lidhet me Ukrainën; demokratët citojnë telefonatën mes Trump dhe presidentit ukrainas Volodimir Zelensky, gjatë së cilës, kreu i Shtëpisë së Bardhë i kërkoi homologut të hetojë ish zv/presidentin Joe Biden.
Seksioni i dytë, ka të bëjë me pretendimet se Shtëpia e Bardhë u përpoq të pengonte hetimet.
“Nuk kam bërë asgjë të keqe. Demokratët janë çmendur”, tha presidenti Trump.
Para se draft-raporti të bëhej publik, republikanët në Dhomën e Përfaqësuesve publikuan një raport të vetin prej 123 faqesh ku dënonin dëshmitarët, të cilët i quajtën burokratë jo të zgjedhur.
“Nuk ka asnjë provë dërrmuese atje. I vetmi votim dypalësh që kemi pasur në këtë dhomë është për të mos e vazhduar hetimin për shkarkimin e presidentit”, u shpreh Liz Cheney.
Komisioni i inteligjencës e aprovoi raportin sipas linjave partiake, me 13 vota pro e 9 kundër dhe tani do ta dorëzojë atë në komisionin e drejtësisë, në Dhomën e Përfaqësuesve. Edhe atje do të zhvillohen seanca e do të hartohen aktakuzat kundër presidentit Trump. (A2 Televizion)
A2 CNN Livestream
MUND TE LEXONI GJITHASHTU
