Një ditë para zgjedhjes së kreut të ri të SPAK-ut, zëvendësdrejtori për Çështjet e Europës Perëndimore dhe Qendrore në Departamentin e Shtetit, Lyn Debevoise, ka zhvilluar sot një vizitë në Prokurorinë e Posaçme. Ambasada e Shteteve të Bashkuara në Tiranë njofton se vizita kishte në fokus forcimin e bashkëpunimit mes SHBA-së dhe Shqipërisë në luftën kundër krimit ndërkombëtar dhe korrupsionit.
Gjatë takimit, Debevoise shprehu vlerësimin e Uashingtonit për punën e kryeprokurorit Altin Dumani, veçanërisht për bashkëpunimin e tij me agjencitë amerikane të zbatimit të ligjit në goditjen e rrjeteve të paligjshme që kërcënojnë sigurinë e SHBA-së.
“Përballja me krimin ndërkombëtar kërkon një angazhim të përbashkët. Sot, Zëvendësdrejtori për Çështjet e Europës Perëndimore Qendrore Lyn Debevoise vizitoi SPAK-un për të shprehur vlerësimin e Shteteve të Bashkuara për punën e Kryeprokurorit të Posaçëm Altin Dumani me agjencitë amerikane të zbatimit të ligjit për t'u përballur me rrjetet e paligjshme që kërcënojnë sigurinë e Shteteve të Bashkuara dhe për të luftuar korrupsionin që pengon kompanitë dhe investitorët amerikanë”, njofton ambasada amerikane në Tiranë.
Ambasada thekson se përpjekjet e Dumanit kanë vendosur një standard të lartë për partneritetin mes dy vendeve në luftën kundër organizatave kriminale ndërkombëtare, dhe nënvizon gjithashtu rëndësinë e vazhdimit të këtij bashkëpunimi edhe me drejtuesin e ardhshëm të SPAK-ut.
“Përpjekjet e z. Dumani vendosën standardin për bashkëpunim të fortë mes Shteteve të Bashkuara dhe Shqipërisë kundër organizatave kriminale ndërkombëtare, i cili shpresojmë se do të vazhdojë me pasardhësin e tij”, njofton ambasada e SHBA-së.
(A2 Televizion)
A2 CNN Livestream
MUND TE LEXONI GJITHASHTU
