Partia Demokratike ka njoftuar Policinë e Tiranës për rotestën e nesërme të opozitës. Sipas njoftimit të shpërndarë për mediat nga Policia, PD ka kërkuar leje për zhvillimin e tubimit nga 19:00 deri në 22:00 në bulevardin “Dëshmorët e Kombit”, para Kryeministrisë.
Policia njofton se për garantimin e rendit dhe sigurisë, do të ketë kufizime të qarkullimit dhe ndalim parkimi në disa segmente rrugore, duke nisur që nga mbrëmja e 16 prillit deri në përfundim të tubimit.
Bllokime do të ketë përgjatë bulevardit kryesor, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.
Policia u bën thirrje organizatorëve të respektojnë orarin dhe qytetarëve të tregojnë mirëkuptim, si dhe të shmangin çdo veprim që cenon rendin dhe sigurinë publike.
Njoftimi i DVP Tiranë
Përfaqësues të subjektit politik Partia Demokratike e Shqipërisë kanë njoftuar Policinë e Tiranës për zhvillimin e një tubimi, më datë 17.04.2026, nga ora 19:00 deri në orën 22:00, në bulevardin “Dëshmorët e Kombit”, para godinës së Kryeministrisë.
Në bazë të ligjit “Për tubimet”, Policia e Tiranës ka marrë masat me qëllim garantimin e mbarëvajtjes së tubimit në vendin dhe afatin kohor të kërkuar.
Në zbatim të këtyre masave, ditën e sotme dhe të nesërme, do të kufizohet lëvizja në disa akse/segmente rrugore, konkretisht:
nga ora 23:45 e datës 16.04.2026 deri në përfundim të tubimit, do të bllokohet lëvizja dhe nuk do të lejohet parkimi i automjeteve në bulevardin “Dëshmorët e Kombit”, nga vendi i quajtur “Ura e Dajtit” deri në rrugën “Ismail Qemali”;
nga ora 15:00 e datës 17.04.2026 deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.
Policia e Tiranës apelon për organizatorët e tubimit për respektimin e afatit kohor dhe vendit ku do të zhvillohet tubimi, si dhe kërkon mirëkuptimin e qytetarëve për kufizimin e lëvizjes me automjete.
Gjithashtu, apelon që të distancohen në rast se gjenden përballë veprimeve të kundërligjshme që cenojnë rendin dhe sigurinë publike. (A2 Televizion)
A2 CNN Livestream
MUND TE LEXONI GJITHASHTU
