Kryeministri Edi Rama ka akuzuar publikisht një tjetër përfaqësues të sistemit të drejtësisë për mbështetje ndaj ndërtimeve pa leje. Pas kritikave ndaj prokurores së Shkodrës, Elsa Gjeli, për ndërtimet e paligjshme në Theth, Rama ka shigjetuar këtë herë gjykatësin Hazbi Balliu. Sipas tij, gjykatësi ka marrë një vendim që legjitimon një pallat pa leje të konfiskuar nga shteti në qendër të Tiranës, i cili ishte vendosur në funksion të Agjencisë Shtetërore të Kadastrës. Gjykata e ka njohur si pronë të ligjshme të ndërtuesve, duke vendosur një masë sigurie në favor të tyre.
“Pas prokurores Gjeli, e cila e konsideroi krimin e ndërtimit të një fshati të tërë turistik pa leje në zemër të Thethit, si një zhvillim të natyrës dhe as nuk hapi fare hetime, duke u vendosur hapur në llogoren e Antiligjit e të Antishtetit kundër interesave të Republikës së Shqipërisë, dje u shfaq në të njëjtën llogore gjykatësi Balliu, i cili një pallat të tërë pa leje të konfiskuar nga shteti në mes të Tiranë dhe të vendosur në funksion të Agjencisë Shtetërore të Kadastrës, e konsideroi si pronë legjitime të ndërtimtarëve të paligjshëm, duke vendosur masë sigurie në favor të tyre”, shprehet Rama.
Në një postim në rrjetet sociale, Rama e cilësoi këtë veprim si një goditje ndaj shtetit ligjor dhe akuzoi prokurorë e gjyqtarë se po mbajnë në këmbë strukturat e vjetra që pengojnë drejtësinë dhe mbrojnë interesa në dëm të shtetit.
“Fatkeqësisht as Gjeli as Balliu, nuk janë të vetmit prokurorë e gjykatës që po mbajnë gjallë në sistemin tonë të drejtësisë forcën e vjetër brutale të Antiligjit e të Antishtetit në dëm të interesave të shtetit, të komunitetit e të njerëzve të zakonshëm të këtij vendi, sa herë që përballë tyre gjenden subjekte të biznesit të madh”.
Ai ngriti shqetësimin për mungesën e reagimit nga institucionet e pavarura të sistemit të drejtësisë, duke kërkuar përgjegjësi për vendimet që sipas tij dëmtojnë interesin publik dhe ligjin.
“Pyetja që rilind në vend të ulërimës së revoltës edhe në këtë rast është, ku janë institucionet e pavarura të qeverisjes së gjyqësorit e të kontrollit të këtyre shpërdoruesve të pavarësisë së drejtësisë, të cilat prej kohësh po provojnë inekzistencën e tyre në raport me abuzime ulëritëse prokurorësh e gjykatësish të çdo niveli? Njerëzit që na votojnë e kërkojnë llogarinë tek ne për qëndrimet Antiligj e Antishtet të njerëzve të drejtësisë së pavarësuar totalisht nga ekzekutivi. Po ne ku ta kërkojmë llogarinë në emër të interesave të tyre dhe të vetë shtetit, për këto e shumë thika të tjera pas shpinës që Republika jonë dhe plot qytetarë të saj marrin nga Gjelat e Ballinjtë brenda sistemit të drejtësisë, të cilët paguhen prej taksave të shqiptarëve më shumë e shumë më shumë se sa të gjithë rrogëtarët e tjerë të këtij shteti”.
Rama theksoi se qytetarët ua dhanë këtë mandat për drejtësi dhe paralajmëroi se drejtësia vonon po nuk harron.
“Një gjë është pak po e sigurt: Mandatin e fortë për ta bërë Shqipërinë 2030 shtet të së drejtës, anëtar të Bashkimit Europian, shqiptarët nuk e na e dhanë për të ngritur duart lart përballë Gjelave të prokurorive e Ballinjve të gjykatave, qoftë kur shqelmojnë Republikën qoftë kur grushtojnë njerëzit që meritojnë drejtësi, vetëm drejtësi dhe as më shumë e as më pak se sa drejtësi. Drejtësia vonon po nuk harron, thotë Populli. Për të gjithë”, përfundoi Rama. (A2 Televizion)
A2 CNN Livestream
MUND TE LEXONI GJITHASHTU
